ក្នុងឆ្នាំ២០០៧នេះ មានការកែច្នៃ ឬការរកឃើញថ្មី របស់ខ្មែរជាច្រើន។ ការកែច្នៃទាំងនោះរួមមានឧបករណ៍ប្រើប្រាស់ ដូចជាឧបករណ៍អគ្គិសនី គ្រឿងយន្តធុនតូចសម្រាប់ប្រើប្រាស់ផ្ទាល់ខ្លួន ព្រមទាំងការកែច្នៃយកថាមពលអគ្គិសនី ឬឧស្ម័នពីរុក្ខជាតិ ឬលាមកសត្វ មកប្រើប្រាស់ប្រចាំថ្ងៃ រួមទាំងស្នាដៃផ្សេងៗដែលបង្កើតថ្មីទៀតផង។
១. លោក គង់ ផារិទ្ធ អតីតគ្រួបង្រៀនផ្នែកគណិតវិទ្យា និងរូបវិទ្យា ហើយបច្ចុប្បន្នជាប្រធានអង្គការអ្នកកសាងសមត្ថភាព និងជាប្រធានមណ្ឌលវៃឆ្លាត កាលពីឆ្នាំ២០០៥ លោកបានធ្វើឱ្យមានការភ្ញាក់ផ្អើលមួយ ដោយសារតែលោកបានធ្វើការកែច្នៃកង់ដើរដោយថាមពលពន្លឺព្រះអាទិត្យមួយគ្រឿង ដោយជោគជ័យ។ នៅដើមឆ្នាំ ២០០៧ ដោយគំនិតច្នៃប្រឌិត លោកបានកែច្នៃកង់ប្រើពន្លឺព្រះអាទិត្យបានចំនួន២គ្រឿងបន្ថែមទៀត ដែលមានលក្ខណៈទំនើប គុណភាពល្អ និងស្រួលប្រើជាងមុន។ លោក គង់ ផារិទ្ធ ឱ្យដឹងថា ការកែច្នៃថ្មីនេះ គឺល្បឿនរបស់កង់អាចរត់បានពី ៣០ ទៅ ៣៥ គីឡូម៉ែត្រ ក្នុងមួយម៉ោង ព្រមទាំងស៊ីថាមពលតិចជាងមុនទៀតផង។ កង់ពីគ្រឿងដែលខំកែច្នៃចុងក្រោយនេះ គឺកង់ទី១ ប្រើលេខអូតូ មានពីរប្រភេទនៃល្បឿន ដោយបំពាក់បន្ទះកញ្ចក់ស្របពន្លឺព្រះអាទិត្យនៅពីក្រោយមួយបន្ទះទំហំ ៤៩ សង់ទីម៉ែត្រ ស្មើនឹង ២៥វ៉ាត់ សម្រាប់បញ្ចូលទៅក្នុងអាគុយ ១២វ៉ុល។ រីឯកង់ទី២ ប្រើហ្គែរសម្រាប់បញ្ជាល្បឿនដែលបំពាក់បន្ទះកញ្ចក់ស្រូបពន្លឺព្រះអាទិត្យចំនួន ២បន្ទះ ដែលមួយបន្ទះមានទំហំ ៣៥សង់ទីមែត្រ គុណនឹង ២៩ សង់ទីម៉ែត្រ ស្មើនឹង ១០វ៉ាត់ បញ្ចូលទៅក្នុងអាគុយ ១២វ៉ុល ដោយបន្ទះកញ្ចក់នីមួយៗ អាចបត់បែនទៅរកពន្លឺថ្ងៃបាន។
ក្រៅពីការកែច្នៃកង់ប្រើពន្លឺព្រះអាទិត្យ លោកបានកែច្នៃគ្រឿងអេឡិចត្រូនិកមួយចំនួនប្រើថាមពលពន្លឺព្រះអាទិត្យបានជោគជ័យដូចជាកង់ដែរ។ គ្រឿងអេឡិចត្រូនិកដែលលោកបានកែច្នៃនោះ គឺមានដូចជាឧបករណ៍សុវត្ថិភាពស្វ័យប្រវត្តិ និងកុំព្យូទ័រប្រើពន្លឺព្រះអាទិត្យ ហើយស៊ីភ្លើងតិច។
២. លោក តេង ប៉េងស៊ាង អាយុ៤៥ឆ្នាំ ជាអ្នកកែច្នៃឧបករណ៍មនុស្សជិះហោះបាន ដែលមានឈ្មោះថា Para Motor។ លោកជាមន្ត្រីនៅក្រសួងកសិកម្ម រុក្ខាប្រមាញ់ និងនេសាទ ហើយគាត់រៀនចប់អនុបណ្ឌិតវិទ្យាសាស្ត្រនៅប្រទេសថៃ ផ្នែក Space Technology Application and Research។
លោក តេង ប៉េងស៊ាង អាចកែច្នៃ Para Motor សម្រាប់ជិះហោះបានដោយជោគជ័យ កាលពីឆ្នាំ២០០៦ ចំនួនមួយគ្រឿង ហើយរហូតដល់ឆ្នាំ២០០៧ លោកកែច្នៃបានរហូតដល់ទៅ ៣គ្រឿង សម្រាប់ជាការប្រើប្រាស់ផ្ទាល់ខ្លួន។ លោកបានឱ្យដឹងថា ឧបករណ៍ហោះនេះផ្គុំឡើងដោយឆត្រយោង និងគ្រឿងម៉ាស៊ីន ដោយយកម៉ាស៊ីនម៉ូតូចាស់ៗពីរតង់ ដែលមានកម្លាំងពី ១២៥សេសេ ដល់២០០សេសេ មកកាត់ដោយកែច្នៃបន្ថែមថាមពលឱ្យខ្លាំងទើបអាចហោះឡើងបាន ដោយបំពាក់កង្ហារឈើជាប់ជាមួយនឹងម៉ាស៊ីន ដែលមានប្រវែង១,១០ម៉ែត្រ។
ឧបករណ៍នេះជិះបានតែមនុស្សម្នាក់ប៉ុណ្ណោះដែលមានកៅអីអង្គុយ ខ្សែក្រវាត់ ព្រមទាំងឆត្រយោងទំហំ ២៧ម៉ែត្រការ៉េ។ ពេលហោះឡើងទៅលើ ជាប់នឹងខ្លួនបំពាក់ឧបករណ៍ GPS សម្រាប់រកទិស និងរយៈកម្ពស់ ព្រមទាំងការមេរ៉ាថតរូបមួយផង។ Para Motor នេះអាចហោះបានក្នុងល្បឿន ៨០គីឡូម៉ែត្រ ក្នុងមួយម៉ោង ព្រមទាំងអាចហោះបានក្នុងរយៈកម្ពស់៥.០០០ម៉ែត្រ។ លោកបានឱ្យដឹងទៀតថា រហូតដល់ឆ្នាំ២០០៧ គឺផលិត Para Motor បានចំនួន ៣គ្រឿង ហើយសម្រាប់ប្រើប្រាស់ផ្ទាល់ខ្លួន ហើយអាចផលិតបានច្រើនទៀត ប្រសិនបើមានអ្នកត្រូវការ ព្រមទាំងមានកម្លាំង និងសមត្ថភាពខ្លាំងជាងមុនទៀតផង។
៣. ក្រុមហ៊ុន យូណាយធីត ហូលឌីង បានធ្វើការកែច្នៃ ដោយយកកំប្លោកធ្វើជាគ្រឿងសង្ហារិមសម្រាប់ប្រើប្រាស់។ គ្រឿងសង្ហារិមដែលយកកំប្លោកទៅកែច្នៃនេះមានដល់ទៅជាង ៤០ប្រភេទ ហើយធ្វើដោយដៃសុទ្ធសាធ មានដូចជា កន្ត្រក ហិប កៅអី សាឡុង ថាស ថូផ្កា គ្រែ តុ ទូ ធុងសំរាម និងសម្ភារៈជាច្រើនមុខទៀត។ គ្រឿងសង្ហារិមដែលធ្វើពីកំប្លោកនេះមានគុណភាពខ្ពស់ស្អាត ព្រមទាំងមានការចាប់អារម្មណ៍ពីអ្នកប្រើប្រាស់ទាំងក្នុង និងក្រៅប្រទេស ដែលជាពិសេសកន្លងមកបាននាំចេញទៅលក់នៅប្រទេសអង់គ្លេស ន័រវ៉េស ប៉ូឡូញ អាល្លឺម៉ង់ ហ្វាំងឡង់ និងជប៉ុន ថែមទៀតផង។
៤. ជាមោទនភាពថ្មីមួយ ដែលអត្ថបទរបស់លោក ឡាយ វិច្ឆិកា ត្រូវបានចុះផ្សាយនៅក្នុងឆ្នាំ២០០៧ ក្នុងសៀវភៅពិភពលោកស្ដីពីវិទ្យាសាស្ត្រ សង្គម (International Encyclopedia of the Social Science) បោះពុម្ពជាលើកទី២ ដោយសាជីវកម្មថមសុន (Thomson Learning) ដែលជាគ្រឹះស្ថានផ្នែកអប់រំសិក្សាធិការដ៏ល្បីល្បាញនៅលើពិភពលោកមួយស្ថិតនៅសហរដ្ឋអាមេរិក។ សៀវភៅនេះមានតម្លៃ ៩៧៣ ដុល្លារអាមេរិក ក្នុងមួយក្បាល។ សៀវភៅនេះជាឯកសារយោង និងស្រាវជ្រាវដ៏គួរឱ្យទុកចិត្តមួយ។
អត្ថបទដែលសរសេរដោយលោក ឡាយ វិច្ឆិកា មានចំណងជើងថា "ប៉ុល ពត"។ ក្រៅពីអត្ថបទនេះ មានអត្ថបទផ្សេងទៀតរបស់លោក ឡាយ វិច្ឆិកា ត្រូវបានចុះផ្សាយក្នុងគេហទំព័ររបស់មូលនិធិទូតនៅប្រទេសស្វីស គេហទំព័ររបស់សាកលវិទ្យាល័យកាលីហ្វ័រញ៉ា និងអត្ថបទផ្សេងៗទៀតចំនួន ១៣០អត្ថបទ។
លោក ឡាយ វិច្ឆិកា ជាអតីតជំនួយការសមាជិកសភាម្នាក់ ជាអ្នកបកប្រែនៅពីរ៉ាមីដ ជាមន្ត្រីកម្មវិធីផ្នែកច្បាប់ការងារ ព្រមទាំងមានមុខងារមួយចំនួនទៀត។
៥. នៅក្នុងឆ្នាំ២០០៧ នេះ កសិករនៅឃុំញ៉ែងញ៉ង ស្រុកត្រាំកក់ ខេត្តតាកែវ បានរកឃើញអំពីការប្រើប្រាស់ថ្នាំបែបបុរាណម្យ៉ាង ដែលអាចកម្ចាត់សត្វមមាចត្នោតចង្រៃដែលបំផ្លាញដំណាំស្រូវយ៉ាងមានប្រសិទ្ធភាពបំផុត។ ថ្នាំនេះមានសមាសធាតុផ្សំ ដូចជា ស្លឹកទៀប គ្រាប់ទៀប វល្លិបណ្ដូលពេជ្រ ថ្នាំខ្លាំង ម្ទេស សាប៊ូ ប្រេងកាត និងទឹកបុកលាយបញ្ចូលគ្នា រួចបាញ់ទៅលើស្រូវតែម្ដង។
៦. បន្ទាប់ពីការយកប្រេងល្ហុងខ្វងមកច្នៃធ្វើជាប្រេងឥន្ធនៈបាននោះ បច្ចុប្បន្នគេអាចកែច្នៃថាមពលជីវឥន្ធនៈ ហៅថា "អេតាណុល" ដែលផលិតចេញពីវត្ថុធាតុដើម ដូចជាអំពៅ ពោត ដំឡូង ឆៃថាវ ស្ដៅ និងស្រូវសាលី ជាដើម មកប្រើប្រាស់ជំនួសប្រេងឥន្ធនៈបាន។ ដើមក្ទម្ពទេសក៏ជាវត្ថុធាតុដើមក្នុងការផលិតឥន្ធនៈជីវម៉ាស់ ដើម្បីបង្កើតជាថាមពលអគ្គិសនីសម្រាប់ប្រើប្រាស់បានដែរ។ សព្វថ្ងៃនេះថាមពលអគ្គិសនីដែលដើរដោយឥន្ធនៈជីវម៉ាស់នេះ កំពុងតែដំណើរការសាកល្បងនៅខេត្តបាត់ដំបង និងបណ្ដាខេត្តមួយចំនួនទៀត។ នេះជាបច្ចេកទេសថ្មីមួយទៀតសម្រាប់ប្រទេសកម្ពុជាតាមរយៈការផលិតអគ្គិសនីចេញពីវត្ថុធាតុដើមរុក្ខជាតិទាំងអស់នេះ។
ថាមពលជីវម៉ាស់នេះគឺជាការយកកាកសំណល់រុក្ខជាតិផ្សេងៗ មកដុតកម្ទេច ហើយការដុតកាកសំណល់នេះអាចទាញយកផលប្រយោជន៍បានពីរយ៉ាង គឺទីមួយ ដុតកម្ដៅដើម្បីយកចំហាយ ហើយទីពីរ ធ្វើឧស្ម័នកម្មដោយយកដើមឈើទៅដុត ព្រោះដើមឈើមានជាតិឧស្ម័ន ឬជាតិហ្គាសយកមកធ្វើឧស្ម័នកម្មបន្សុតជាតិឧស្ម័ន ដើម្បីបង្វិលធូប៊ីនហ្គាសធូប៊ីន៕