ការចំរាញ់ប្រេងពីរុក្ខជាតិបាតសមុទ្រធ្វើជាប្រេងឥន្ធនៈសំរាប់យន្តហោះ
14.តុលា.2010 អ្នកស្រាវជ្រាវបានសង្ឃឹមថា ការចំរាញ់យកពីរុក្ខជាតិបាតសមុទ្រនឹងអាចធ្វើទៅបាន ក្នុងកំឡុងពេល៤ឆ្នាំខាងមុខនេះ។ ឧស្សាហកម្មធំៗរួមមានក្រុមហ៊ុនអាកាសចរណ៍ ប្រ៊ីតធីស អ៊ែរវ៉េស៍ (British Airways) និងក្រុមហ៊ុនអាកាសចរណ៍ អ៊ែរបឹស (Airbus) គាំទ្រគំរោងការមួយនៅសាកលវិទ្យាល័យ គ្រែនហ្វីល (Cranfield University) របស់ចក្រភពអង់គ្លេស ក្នុងការរិះរកមធ្យោបាយប្រមូលរុក្ខជាតិបាតសមុទ្រទាំងនោះមកធ្វើ ជាប្រេងឥន្ធនៈសម្រាប់យន្តហោះ។
គំរោងការនេះ បានចាប់ផ្តើមដំណើរការក្រោយពេលសន្និសីទឋរៀងរាល់បីឆ្នាំម្តង ដែលចូលរួមដោយប្រតិភូ ១៥០០នាក់ ដែលមកពីរដ្ឋាភិបាល និងឧស្សាហកម្ម អាកាសចរណ៍ ដែលត្រូវបានបញ្ចប់នៅថ្ងៃទី៨ ខែតុលា ឆ្នាំ២០១០ កន្លងទៅថ្មីៗ។ គំរោងការនេះ មានទិសដៅបំពេញតម្រូវការប្រេងឥន្ធនៈសម្រាប់ការប្រើប្រាស់ប្រចាំថ្ងៃអោយបាន គ្រប់គ្រាន់រហូតដល់ឆ្នាំ ២០៥០។
អ្នកស្រាវជ្រាវបង្ហាញអោយដឹងដែរថា ការចំរាញ់ប្រេងពីរុក្ខជាតិបាតសមុទ្រប្រសើរជាង ការចំរាញ់ប្រេងពីជីវៈម៉ាស់ផ្សេងៗទៀត ដោយសាវាមិនប៉ះពាល់ដល់ផ្ទៃដីសំរាប់ផលិតអាហារ។ លោកសាស្ត្រាចារ្យ ហ្វៀហ្កាល ប្រិននែន (Feargal Brennan) នៃសាកលវិទ្យាល័យ គ្រែនហ្វីល បានជឿជាក់ថា រុក្ខជាតិបាតសមុទ្រអាចផលិតជាប្រេងឥន្ធនៈក្នុងទ្រង់ទ្រាយធំបាន ក្នុងកំឡុងពេល ៤ឆ្នាំខាងមុខនេះ។ លោកសាស្ត្រាចារ្យបានបន្តទៀតថា "គុណសម្បត្តិដ៏អស្ចារ្យនោះគឺយើងអាចប្រមូលផលរុក្ខជាតិបាតសមុទ្រ រៀងរាល់ ៧ ទៅ១២ថ្ងៃម្តង ដូច្នេះយើងអាចប្រមូលផលពី៣០ទៅ៥០ដងក្នុងមួយឆ្នាំ ។ បញ្ហាដ៏ប្រសើរបំផុតនោះ គឺការចំរាញ់ប្រេងពីជីវម៉ាស់នេះ ដើម្បីយកទៅប្រើប្រាស់ វាមិនមានផលប៉ះពាល់អ្វី ដល់បរិស្ថានឡើយ" ៕
មុយខេង