ភ្នំពេញៈ រោងចក្រផលិតជីវឥន្ធនៈលើកដំបូងនៅកម្ពុជា នៅតែពន្យារពេលបើកដំណើរការរបស់ខ្លួនរហូតដល់ខែកក្កដា ខណៈដែលដំឡូងមីស្ងួតនៅតែមានតម្លៃខ្ពស់។
លោក គីម ជុងហូ ប្រធានរដ្ឋាភិបាលនៅ រោងចក្រ MH Bio-Energy Cambodia បាននិយាយថា៖ «នៅខណៈពេលនេះយើងពុំមានគម្រោងបើករោងចក្រវិញនៅឡើយទេ ប៉ុន្តែយើងសង្ឃឹមថា នឹងចាប់ផ្តើមឡើងវិញនៅខែកក្កដាឆ្នាំនេះ»។
រោងចក្រជីវឥន្ធនៈដែលមានទីតាំងស្ថិតនៅក្នុងខេត្តកណ្តាល ហើយគ្រប់គ្រងដោយកូរ៉េខាងត្បូងនេះ បានប្រើប្រាស់ដំឡូងមីដើម្បីផលិតអេតាណុលសម្រាប់នាំចេញទៅ អឺរ៉ុប។ រោងចក្រនេះបានបើកដំណើរការដំបូងនៅឆ្នាំ២០០៨ ដែលមានទុនដំបូង៣០លានដុល្លារ។
នៅឆ្នាំ២០០៩ រោងចក្រនេះបាននាំចេញអេតាណុលចំនួន២៩ ៤០៦តោនទៅទីផ្សារអឺរ៉ុប។ តែទោះយ៉ាងណារោងចក្រនេះបានបិទទ្វារតាំងពីខែឧសភា ឆ្នាំ២០១០ ដោយសារតែការកើនឡើងតម្លៃដំឡូងមី។
ក្រុមហ៊ុននេះ បានទិញដី៨ពាន់ហិកតាដើម្បីដាំដំឡូងមី ក្នុងបំណងបញ្ចប់ការទិញដំឡូងពីទីផ្សារ ប៉ុន្តែមកដល់ពេលនេះដាំតែ១៧០០ហិកតាប៉ុណ្ណោះ។
លោក គីម ជុងហូ បាននិយាយថា៖ «វាមិនគ្រប់គ្រាន់សម្រាប់ការផលិតរបស់យើងឡើយ យើងត្រូវការដំាដំឡូងឲ្យបាន៦ពាន់ហិកតាដើម្បីគាំទ្រដល់ការផលិត របស់យើងនៅឆ្នាំនេះ»។
រោងចក្រនេះត្រូវការដំឡូងមី១ម៉ឺនតោនក្នុងមួយខែៗដើម្បីផលិត អេតាណុល ដែលជាបរិមាណមួយដែលគេអាចយកទៅលាយជាមួយប្រេង។ ដំឡូងមីស្ងួតបច្ចុប្បន្នមានតម្លៃ២៤០ដុល្លារក្នុងមួយតោន គឺបានកើនឡើងពី១៧០ ទៅ១៨០ដុល្លារក្នុងមួយតោន។
កសិករដាំដំឡូងមី នៅខេត្តបន្ទាយមានជ័យ ចក ភោក បាននិយាយថា តម្លៃដំឡូងមីប្រែប្រួលទៅតាមតម្រូវការ ដែលភាគច្រើនពីប្រទេសថៃ និងវៀតណាម។ ស្ត្រីជាកសិកររូបនេះបន្តថា បច្ចុប្បន្នគាត់លក់បាន៩៣ដុល្លារក្នុងមួយតោន កើនពី៤៥ដុល្លារពីឆ្នាំទៅ។
ចក ភោកបន្ថែមថា៖ «ខ្ញុំសង្ឃឹម ថានឹងមានទីផ្សារថ្មីនៅចិន យើងកំពុងសម្លឹងទៅការនាំចេញទៅចិនឆាប់ៗនេះ»។
ខែមុន នាយករដ្ឋមន្ត្រីហ៊ុន សែន បានថ្លែងថា កិច្ចព្រមព្រៀងស្តីពីការនាំចេញដំឡូងមីពីកម្ពុជាទៅចិន ត្រូវបានចុះហត្ថលេខាក្នុងអំឡុងពេលដំណើរទស្សនកិច្ចប្រាំថ្ងៃ របស់លោកនៅប្រទេសចិន៕
Trackback(0)
TrackBack URI for this entryComments (0)
Show/hide comments