បាងកកៈ ការអភិវឌ្ឍប្រេងឥន្ធនៈជំនួស (ឥន្ធនៈដែលមិនផលិតចេញពីសាំង) នៅក្នុងប្រទេសថៃ កំពុងតែកើនឡើងក្នុងឆ្នាំ២០១១ ខណៈតម្លៃប្រេងនៅសកលលោកនៅតែឡើងថ្លៃ ហើយប្រទេសនេះ បានតាំងចិត្តចំពោះការសន្សំថាមពលនិងកាត់បន្ថយការប្រើប្រាស់ ឥន្ធនៈផូស៊ីល។
ទោះជាការផ្គត់ផ្គង់ប្រេងដូងមិនមានគ្រប់គ្រាន់ក្តី ក៏រដ្ឋាភិបាលទំនងជាដំណើរការទៅមុខជាមួយនឹងផែនការនានា ដើម្បីជំនួសជីវឌីសែល B3 ជាមួយនឹង B5នៅត្រឹមពាក់កណ្តាលឆ្នាំនេះ។
ជីវៈឌីសែល B5 ដែលមានជីវឥន្ធនៈប្រេងដូង ៥ភាគរយ ត្រូវបានក្លាយជាគោលដៅសម្រាប់ការអភិវឌ្ឍ ប៉ុន្តែកង្វះខាតប្រេងដូងថ្មីៗនេះ បានបណ្តាលឲ្យក្រុមមន្ត្រីពន្យារពេលអនុវត្ត។
យោងតាមលោក Peeraphol Sakarin អគ្គនាយកនៃនាយកដ្ឋានអាជីវកម្មថាមពល បានឲ្យដឹងថា កំណើនតម្លៃប្រេងឥន្ធនៈអេតាណុលយ៉ាងឆាប់រហ័ស ដូចជាឥន្ធនៈល្បាយឧស្ម័ន និងអេទីលអាល់កុល(gasohol) ប្រភេទ E20 និង E85 ក៏ត្រូវបានរំពឹងថានឹងកើតមានឡើងផងដែរ។
លោក បានព្យាករថានឹងមានកំណើនការប្រើប្រាស់ឧស្ម័នធម្មជាតិ (CNG) និងល្បាយឧស្ម័នអ៊ីដ្រូកាបូន (LPG) ក្នុងវិស័យដឹកជញ្ជូន ខណៈតម្លៃប្រេងសកល អាចកើនឡើងដល់ ១០០ដុល្លារក្នុងមួយធុងនៅឆ្នាំក្រោយពីតម្លៃជាមធ្យម ៧០ដុល្លារក្នុងឆ្នាំ២០១០។
រដ្ឋមន្រ្តីក្រសួងថាមពល លោក Wannarat Channukul បានថ្លែងថា ផែនការមេស្តីពីថាមពលកកើតឡើងវិញសម្រាប់ឆ្នាំ២០១១ ដល់ឆ្នាំ២០៣០ នឹងកំណត់ពីទិសដៅច្បាស់លាស់សម្រាប់ការកាត់បន្ថយការបញ្ចេញឧស្ម័ន ផ្ទះកញ្ចក់ក្នុងរយៈពេលពីរទសវត្សរ៍។
ផែនការនេះ ស្នើឲ្យមានការបង្កើតថាមពលកកើតឡើងវិញដូចជា ជីវៈម៉ាស់ ជីវៈឧស្ម័នជីវឥន្ធនៈ ថាមពលពន្លឺព្រះអាទិត្យ ថាមពលទទួលបានពីខ្សល់ និងឧស្ម័ន CNG ដល់ ២០,៤ភាគរយនៃការប្រើប្រាស់ថាមពលរបស់ប្រទេសថៃនៅត្រឹមឆ្នាំ២០៣០ ធៀបនឹងកម្រិត ៦ភាគរយនាពេលបច្ចុប្បន្ន។
ក្រសួងថាមពល បានព្យាករថា ការប្រើប្រាស់ឧស្ម័ន LPG នៅឆ្នាំនេះ នឹងកើន ១៧,៨ភាគរយ គឺដល់ចំនួន ៧,១លានតោនធៀបនឹងចំនួន ៥,៩លានតោនកាលពីឆ្នាំ២០១០ ហើយឧស្ម័ន CNG ក្នុងវិស័យដឹកជញ្ជូន នឹងងើបឡើង ៣០,៦ភាគរយ ដល់ ៦ ៤០០តោនក្នុងមួយថ្ងៃ ធៀបនឹងចំនួន ៤ ៩០០តោន ចំណែកឯអេតាណុលវិញ កើនឡើង ៤ភាគរយ ដល់ ១,២៨លានលីត្រក្នុងមួយថ្ងៃធៀបនឹងចំនួន ១,២៣លានលីត្រ។
ដោយឡែកសម្រាប់ជីវៈឌីសែលវិញ នឹងមានការស្ទុះងើបរហូតដល់ទៅ១០ភាគរយ គឺដល់ចំនួន ១,៩លានលីត្រក្នុងមួយថ្ងៃបើប្រៀបធៀបទៅនឹងចំនួន១,៧២លានលីត្រដែលគេផលិតបានកាលពីឆ្នាំ២០១០៕KC
Trackback(0)
TrackBack URI for this entryComments (0)
Show/hide comments
Show/hide comment form
