រោងចក្រ “អេតាណុល” ដំបូងត្រូវបានសម្ពោធដាក់ឲ្យប្រើប្រាស់
វិច្ឆិការ 18th, 2008 | 
ស្នើដោយ: 
ភ្នំពេញ៖ រោងចក្រផលិតប្រេងជីវឥន្ធនៈដ៏ធំមួយជាលើកដំបូងរបស់ប្រទេសកម្ពុជា ដែលវិនិយោគដោយក្រុមហ៊ុនមកពីប្រទេសកូរ៉េខាងត្បូងក្នុងទុនវិនិយោគ ចំនួនប្រមាណជាង៤០លានដុល្លារអាមេរិក ត្រូវបានសម្ពោធដាក់ឲ្យដំណើរការនាព្រឹកថ្ងៃទី១៧ ខែវិច្ឆិកានេះ នៅស្រុកពញាឮ ខេត្តកណ្ដាល ក្រោមអធិបតីភាពរបស់សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា។
រោងចក្រផលិតប្រេងជីវឥន្ធនៈរបស់ក្រុមហ៊ុនអិមអេចបាយអូ.អេនើជី (MH.Bio-Energy Co;Ltd) ដែលទើបនឹងសាងសង់រួចនេះ គឺជាសមិទ្ធផលទីមួយរបស់កម្ពុជា ក្នុងគម្រោងបង្កើតជម្រើសថ្មីនៃប្រភពថាមពលពីអេតាណុល។
សម្ដេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានមានប្រសាសន៍ថា រោងចក្រនេះនឹងផ្ដល់នូវគុណប្រយោជន៍ច្រើនសម្រាប់សេដ្ឋកិច្ចកម្ពុជា ក្នុងនោះមានដូចជាការបង្កើតប្រភពចំណូលថ្មីសម្រាប់ជញ្ជីង ពាណិជ្ជកម្ម និងការបង្កើតការងារសម្រាប់ បុគ្គលិក កម្មករ ប៉ុន្តែអ្វីដែលជាគុណប្រយោជន៍ពិសេស និងមានចរិតយុទ្ធសាស្ត្រសម្រាប់ប្រទេសកម្ពុជា គឺការវិនិយោគ និងដំណើរការប្រព្រឹត្តទៅនៃរោងចក្រផលិតប្រេងជីវឥន្ធនៈនេះ នឹងនាំមកនូវការផ្ទេរបច្ចេកវិជ្ជាដ៏ធំមួយសម្រាប់កម្ពុជា ពោលគឺការកសាងនូវសមត្ថភាពក្នុងស្រុកមួយសម្រាប់កម្ពុជានៅក្នុង វិស័យថាមពលកើតឡើងវិញ និងជម្រើសថ្មីនៃប្រភពថាមពល។
សម្ដេចតេជោ ហ៊ុន សែន បានធ្វើការកត់សម្គាល់ថា អ្វីដែលសំខាន់នៅទីនេះ គឺមិនមែនគ្រាន់តែជាបញ្ហារោងចក្រដាច់ដោយឡែកទេ រោងចក្រនេះអាចនិយាយបានថា ជាផ្សាររបស់កសិករដាំដំឡូងទៅវិញទេ។ ហើយប្រសិនបើរោងចក្រនេះពង្រីកលទ្ធភាពដល់កម្រិតពេញសមត្ថភាពដែលអាច ឈានទៅដល់៣០ម៉ឺនតោន ទៅ៥០ម៉ឺនតោន ឬលើសពីនេះ កសិកររបស់យើងដាំដំឡូងបានប៉ុន្មាន? មុននេះកសិករយើងដាំគ្រាន់តែសម្រាប់ធ្វើជាស្បៀងបណ្ដោះអាសន្ន ប៉ុណ្ណោះ តែពេលនេះវាក្លាយទៅជាវត្ថុធាតុផ្សំដ៏មានសារសំខាន់មួយសម្រាប់ ប្រើឲ្យវិស័យស្បៀង និងការផលិតនូវជីវឥន្ធនៈ។
តាមតួលេខបានបង្ហាញថា ឆ្នាំទៅកសិករកម្ពុជាដាំដំឡូងមីត្រឹមតែ១០ម៉ឺនហិកតាទេ តែឆ្នាំ២០០៨ បានឡើងដល់១៧,៥ម៉ឺនហិកតា។ អ៊ីចឹងទេឆ្នាំក្រោយតទៅទៀត ការដាំដំឡូងមីនឹងកាន់តែកើនឡើងថែមទៀត ដែលនេះគឺជាការបង្កើតការងារបង្កើតទីផ្សារសម្រាប់កសិករ និងការកាត់បន្ថយភាពក្រីក្រ។
សម្ដេចតេជោបានបន្តថា ដំណើរការផលិតកម្មនេះនឹងផ្ដល់សារសំខាន់៦យ៉ាង ដែលផ្សារភ្ជាប់គ្នាយ៉ាងជិតស្និទ្ធរវាងវិស័យឧស្សាហកម្ម និងកសិកម្ម ក្នុងនោះរួមមានការផ្ដល់តម្លៃបន្ថែមទៅលើវត្ថុធាតុដើមម្សៅ ដំឡូងមី ដែលកន្លងមកនាំចេញដោយពុំបានកែច្នៃ។ ការបង្កើតការងារ និងបង្កើនប្រាក់ចំណូលជូនប្រជាកសិករ។ ការបណ្ដុះបណ្ដាលបច្ចេកទេស និងជំនាញផ្សេងទៀតដល់បុគ្គលិកកម្មករ តាមភារកិច្ចរបស់ខ្លួនក្នុងអំឡុងពេលបំពេញការងារតាមរយៈធ្វើការ សិក្សា និងអនុវត្តផ្ទាល់នៅនឹងកន្លែង។ ការផ្ទេរនូវបច្ចេកវិជ្ជាថ្មីៗដែលកន្លងមកកម្ពុជាពុំធ្លាប់មាន។ ការបង្កើតការនាំចេញដោយបន្ថែមនូវមុខផលិតផលថ្មីលើមុខផលិតផលចាស់ ដែលធ្លាប់នៃចេញកន្លងមក ហើយក៏ជាការចូលរួមកាត់បន្ថយអតុល្យភាពជញ្ជីងពាណិជ្ជកម្ម និងការបង្កើតសេវាកម្មគាំទ្រផ្សេងៗទៀត ជាច្រើន ដែលពាក់ព័ន្ធនឹងវិស័យជីវថាមពល។
គួរកត់សម្គាល់ថា នាពេលកន្លងទៅរោងចក្រអិមអេចបាយអូ.អេនើជីនេះ ត្រូវបានទទួលការរិះគន់យ៉ាងខ្លាំងពប្រជាពលរដ្ឋដែលរស់នៅទីនោះ ដោយសារថា បានបង្ហូរសារធាតុពុលទៅក្នុងបឹង។
សម្ដេចតេជោ ហ៊ុន សែន បានសុំទោសចំពោះប្រជាពលរដ្ឋនៅទីនោះដែលពេលកន្លងមករោងចក្របាន ធ្វើឲ្យមានការប៉ះពាល់បញ្ហាបរិស្ថានចំពោះប្រជាពលរដ្ឋនៅជិតខាង រោងចក្រ។ សម្ដេចបានបន្តថា បញ្ហានេះបង្កឡើងដោយសារតែបញ្ហាអាកាសធាតុធ្វើឲ្យការដឹកជញ្ជូន សម្ភារៈឧបករណ៍កម្ចាត់ជាតិពុលក្នុងរោងចក្រមកមិនទាន់ពេលវេលា។ ក៏ប៉ុន្តែចាប់ពីពេលនេះទៅលែងមានការបង្ហូរជាតិពុលទៅក្នុងបឹង ទៀតហើយ ព្រោះរោងចក្របានបំពាក់ឧបករណ៍ធានាការពារសុវត្ថិភាព និងការពារឲ្យបាននូវបំពុលបរិស្ថានផ្សេងៗ។
លោក ស៊ុយ សែម រដ្ឋមន្ត្រីក្រសួងឧស្សាហកម្មរ៉ែ និងថាមពលបានមានប្រសាសន៍ឲ្យដឹងថា នៅឆ្នាំ២០០១ក្រុមហ៊ុនអិមអេច បាយអូ អេនើជី បានសហការជាមួយក្រុមហ៊ុន ស៊ី-ជេកម្ពុជា ធ្វើការដាក់ទុនវិនិយោគលើការដាំដំណាំដំឡូងមីលើផ្ទៃដីប្រមាណ ៨.០០០ហិកតា នៅខេត្តកំពង់ស្ពឺ និងបានបង្កើតរោងចក្រផលិតម្សៅដំឡូងមីនៅទីនោះ ដើម្បីផលិត និងនាំចេញ។ បន្ទាប់មកដោយមានទំនុកចិត្តកាន់តែខ្ពស់លើបរិស្ថានវិនិយោគនៅ កម្ពុជា និងដោយពិនិត្យឃើញថា ប្រទេសកម្ពុជា មានលក្ខណសម្បត្តិគ្រប់គ្រាន់សម្រាប់ការបង្កើតរោងចក្រកែច្នៃម្សៅ ដំឡូងមីផលិតជាប្រេងជីវឥន្ធនៈ “អេតាណុល” ដើម្បីផ្គត់ផ្គង់ឲ្យការកើនឡើងឥតឈប់ឈរនៃតម្រូវការប្រេងឥន្ធនៈនៅ លើពិភពលោកក្រុមហ៊ុនអិមអេចបាយអូអេនើជី ក៏បានចាប់ផ្ដើមធ្វើការសាងសង់រោងចក្រដែលស្ថិតនៅចំពោះមុខយើង ទាំងអស់គ្នានេះឡើងនៅក្នុង ខែវិច្ឆិកា ឆ្នាំ២០០៦ ហើយការសាងសង់បានបញ្ចប់ជាស្ថាពរ នៅខែមេសាឆ្នាំ២០០៨ ដោយចំណាយទុនវិនិយោគសរុបប្រមាណ ៤០លានដុល្លារ អាមេរិក។
បច្ចុប្បន្នរោងចក្រផលិតប្រេងជីវឥន្ធនៈ “អេតាណុល” ដែលបានកសាងរួចហើយនេះ មានសមត្ថភាពផលិតប្រេងជីវឥន្ធនៈអេតាណុល៣៦.០០០តោនក្នុងមួយឆ្នាំ សម្រាប់នាំចេញ និងត្រូវការវត្ថុធាតុដើមម្សៅដំឡូងមីស្ងួតចំនួន១០០.០០០តោនក្នុង មួយឆ្នាំដែលបានមកពីកសិដ្ឋានផ្ទាល់របស់ក្រុមហ៊ុន និងទិញបន្ថែមពីបងប្អូនកសិករតាមបណ្ដាខេត្តនានា។ រោងចក្រនេះនឹងផ្ដល់ការងារដល់កម្មករផលិតផ្ទាល់ចំនួន១៩២នាក់នៅ ក្នុងខ្សែសង្វាក់ផលិតកម្មរបស់ខ្លួន ហើយក្រុមហ៊ុនមានគម្រោងពង្រីកសមត្ថភាពក្នុងឆ្នាំបន្តបន្ទាប់ទៀត រហូតដល់មានសមត្ថភាពទ្វេដង ដែលនេះ គឺជាការបង្កើនទីផ្សារបន្ថែមទៀតសម្រាប់បងប្អូនកសិកម្មដែល ដាំដំណាំដំឡូងមី។
បើយោងតាមការបញ្ជាក់របស់លោក វី ស៊ឹងឆយ ប្រធានក្រុមហ៊ុន MH.Group សម្រាប់អនាគតខាងមុខក្រុមហ៊ុននឹងពង្រីកសង្វាក់ផលិតកម្មពីចំនួន១២០ តោន ទៅ៤០០តោនក្នុងមួយថ្ងៃ។ ដូច្នេះក្រុមហ៊ុនត្រូវការវត្ថុធាតុដើមចំនួន២៨ម៉ឺនតោន និងអាចផលិតអេតាណុលបាន១២ម៉ឺនតោនក្នុងមួយឆ្នាំ៕
