English
ភ្នំពេញៈ តម្លៃប្រេងដូងកម្ពុជាបានធ្លាក់ចុះជិត១០ភាគរយនៅដើមខែតុលានេះ ខណៈដែលបរិមាណប្រេងដូងនៅលើទីផ្សារ អន្តរជាតិមានការកើនឡើង។ នេះបើតាមការអះអាងពីអគ្គនាយកក្រុមហ៊ុន ម៉ុង ឫទ្ធី គ្រុប។
លោក ម៉ុង ឫទ្ធី អគ្គនាយកក្រុមហ៊ុន ម៉ុង ឫទ្ធីគ្រុប បានប្រាប់កាលពីម្សិលមិញថា តម្លៃប្រេងដូងមួយតោនបានធ្លាក់ចុះនៅត្រឹម ៩៥០ដុល្លារ ពោលគឺធ្លាក់ចុះប្រមាណ ៩,៥២ភាគរយ បើប្រៀបធៀបកាលពីខែសីហា ដែលកាលនោះប្រេងដូងមួយតោនមានតម្លៃប្រហែល ១០៥០ដុល្លារ។ លោកបញ្ជាក់ថា៖ «ការធ្លាក់ចុះនៃតម្លៃប្រេងដូង ដោយសារតែបរិមាណប្រេងដូងនៅលើទីផ្សារអន្តរជាតិមានការកើនឡើងដែល ធ្វើឲ្យឈ្មួញទម្លាក់ថ្លៃ»។
លោកបន្តថា នៅរដូវនេះមានភ្លៀងច្រើនដែលធ្វើឲ្យដូងប្រេងផ្តល់ទិន្នផល ខ្ពស់ មិនតែប៉ុណ្ណោះដូងប្រេងនៅប្រទេសផ្សេងៗក៏ទទួលបានផលខ្ពស់ដែរ។
ក្រុមហ៊ុន ម៉ុង ឫទ្ធី គ្រុប បាននាំចេញប្រេងដូងទៅកាន់ទីផ្សារប្រទេសស្វ៊ីស ឥណ្ឌា ម៉ាឡេស៊ី និងវៀតណាម នៅរយៈពេល៦ខែដំបូងនេះមានប្រមាណ១ម៉ឺនតោន និងមានតម្លៃប្រហែល១១លានដុល្លារ ខណៈ៦ខែឆ្នាំ២០១០មានប្រមាណជាង៧ ៦០០តោន និងមានតម្លៃ៧លានដុល្លារ។
លោក ម៉ុង ឫទ្ធី លើកឡើងថា បើទោះបីតម្លៃប្រេងដូងធ្លាក់នៅត្រឹមតម្លៃនេះក្តីក៏ឧស្សាហកម្ម នេះនៅតែមានភាព ល្អប្រសើរ។
លោក ហ៊ាន វ៉ាន់ហន អគ្គនាយករងនៃអគ្គនាយកដ្ឋានកសិកម្មក្រសួងកសិកម្មរុក្ខា ប្រមាញ់ និងនេសាទបានមានប្រសាសន៍ថា ដំណាំដូងប្រេងគឺជាដំណាំដែលមានប្រសិទ្ធភាពសេដ្ឋកិច្ចខ្ពស់ ជាងដំណាំផ្សេងៗ។លោកបញ្ជាក់ថា៖ «វាជាដំណាំឧស្សាហកម្មមួយដែលអាចបង្កើតការងារដល់ប្រជាពល រដ្ឋបានផងដែរ»។
កាលពីថ្មីៗនេះក្រុមហ៊ុន ម៉ុង ឫទ្ធី គ្រុប បានព្យាករថា ការនាំចេញប្រេងដូងរបស់ខ្លួននឹងកើនដល់ជាង២ម៉ឺនតោន ដែលនឹងអាចទទួលចំណូលដល់ទៅ ២០លានដុល្លារ។ តួលេខនេះបានកើនខ្ពស់ជាងកាលពីឆ្នាំមុន ដែលកាលនោះមានប្រមាណជា១៦ ០០០តោន និងផ្តល់ចំណូលជាង១៦លានដុល្លារប៉ុណ្ណោះ ៕{fcomment}
