|
អធិប្បាយចុងក្រោយ
|
| ដោយ រស់ ឌីណា | | | ០៣-០៧-២០០៨ |  បន្ទាប់តម្លៃប្រេងសាំងបានកើនឡើងយ៉ាងគំហុក សហគ្រិនកម្ពុជាដែលប្រើប្រាស់ប្រេងឥន្ធនៈច្រើននោះបានបំពាក់ម៉ាស៊ីនដើរដោយឧស្ម័នផលិតចេញពីអង្កាម លាយជាមួយប្រេងម៉ាស៊ូតធម្មតា។ បច្ចុប្បន្ន រោងម៉ាស៊ីនកិនស្រូវចំនួនយ៉ាងតិច១០មានម៉ាស៊ីនប្រភេទនេះប្រើ ហើយម៉ាស៊ីនភ្លើង«ធម្មជាតិ»ទាំងនេះផ្សេងទៀតនឹងមកដល់កម្ពុជាអំឡុងខែខាងមុខនេះ បើទោះជាតម្លៃក្នុងការដំឡើងម៉ាស៊ីនប្រភេទនេះដំបូងមានកម្រិតខ្ពស់ក៏ដោយ។ អ្នកប្រើប្រាស់ដំបូងៗគេអះអាងថា ផលចំណេញបានមកពីការប្រើប្រាស់ម៉ាស៊ីនទាំងនេះគឺអាចកាត់កងតម្លៃដំឡើងវាបាន។ រីឯបរិស្ថានវិញមានសភាពល្អប្រសើរឡើង ដោយសារតែម៉ាស៊ីនបម្លែងឧស្ម័នជីវម៉ាសទាំងនេះប្រើប្រាស់ប្រភពថាមពលកកើតឡើងវិញ ហើយវាជួយកាត់បន្ថយការបំភាយឧស្ម័នកាបូនិច។ លោកសុង ហុង ថៅកែរោងម៉ាស៊ីនកិនស្រូវនៅខេត្តបាត់ដំបង រីករាយចំពោះការបំពាក់ប្រព័ន្ធបម្លែងឧស្ម័នជីវម៉ាស ជាពិសេសនៅពេលគាត់មើលឃើញការកើនឡើងនៃតម្លៃប្រេងឥន្ធនៈសព្វថ្ងៃ។ លោកបានសម្រេចចិត្តទិញឡផលិតហ្គាសដ៏អស្ចារ្យនេះបន្ទាប់ពីទស្សនកិច្ចមួយនៅក្នុងសហគ្រាសកែច្នៃស្រូវនៅប្រទេសឥណ្ឌា តាមការអញ្ជើញរបស់ក្រុមហ៊ុនកម្ពុជា ឈ្មោះ SME Renouvelable Energy។ តាមរយៈវិធីសាស្រ្តដ៏ល្អិតល្អន់ ឡផលិតហ្គាសនេះបម្លែងអង្កាមទៅជាឧស្ម័ន ដែលមានថាមពល២០០គីឡូវ៉ាត់។
លោកបានពន្យល់ដោយក្តីរីករាយថា៖ «បច្ចុប្បន្ន ខ្ញុំប្រើប្រេងម៉ាស៊ូតតិចជាងមុន ដើម្បីដំណើរការម៉ាស៊ីនកិនស្រូវរបស់ខ្ញុំ។ ពីមុនជារៀងរាល់ថ្ងៃ វាត្រូវការប្រេង ២២០ លីត្រ តែឥឡូវវាប្រើប្រេងអស់តែ ៦០ លីត្រប៉ុណ្ណោះដោយបូកបន្ថែមនឹងអង្កាម ២ តោន ដែលមានតម្លៃតែ ១០ ០០០ រៀល (២,៥ដុល្លារ)។ ដូច្នេះ ខ្ញុំសន្សំបានយ៉ាងតិចក៏ ២០៨ ដែរក្នុងមួយថ្ងៃ ដោយគិតតាមតម្លៃប្រេងម៉ាស៊ូតសព្វថ្ងៃ (១,៣ដុល្លារក្នុងមួយលីត្រ)»។ លោកហុងពេញចិត្តនឹងធ្វើជាអ្នកផ្សព្វផ្សាយម៉ាស៊ីន ជាពិសេសនៅកម្ពុជា។ សហគ្រិនផ្សេងៗទៀតបានមកមើលរោងម៉ាស៊ីនលោក អ្នកខ្លះបានធ្វើតាមលោករួចទៅហើយ រីឯខ្លះទៀតមានបំណងធ្វើតាម។
លោកលាប ម៉ាន់ រស់នៅខេត្តបន្ទាយមានជ័យ អះអាងថា៖ «ប្រសិនបើខ្ញុំគ្មានឡផលិតហ្គាស ជីវម៉ាសនេះទេ រោងចក្រទឹកកករបស់ខ្ញុំប្រហែលបិទទ្វារបាត់ទៅហើយ»។ លោកបានជ្រើសរើសប្រព័ន្ធនេះបន្ទាប់ពីលោកបានទៅទស្សនកិច្ចពិព័រណ៍ជាច្រើនលើក ដែលនៅទីនោះមានតាំងម៉ាស៊ីនកិនស្រូវរបស់លោកសុង ហុងហើយ ហើយ ប្រព័ន្ធនេះមានការនិយមប្រើប្រាស់នៅឥណ្ឌា ប៉ុន្តែនៅប្រទេសកម្ពុជាវានៅថ្មីនៅឡើយ។
ជាមួយនឹងម៉ាស៊ីនភ្លើងថ្មីនេះ ថៅកែរោងចក្រទឹកកកខាងលើនិយាយថា គាត់អាចសន្សំសំចៃប្រេងបាន៧០% នៃការប្រើប្រាស់ប្រចាំថ្ងៃ ដែលប្រែប្រួលចន្លោះពី ៣៥០ ទៅ ៤០០ លីត្រ សម្រាប់រយៈពេល១២ម៉ោងក្នុងមួយថ្ងៃ។ តាមរយៈការដាក់ដំណើរការប្រព័ន្ធបម្លែងឧស្ម័នជីវម៉ាស លោកលាប ម៉ាន់ ប្រើប្រាស់ប្រេងម៉ាស៊ូតតែពី ១០៥ ទៅ១២០ លីត្រ និងអង្កាមពីរតោនប៉ុណ្ណោះក្នុងមួយថ្ងៃ។ សហគ្រិនរូបនេះអះអាងថា៖ «ការណ៍សំខាន់គឺខ្ញុំសន្សំសំចៃការចំណាយលើប្រេងម៉ាស៊ូតបានពី ៣១៨ ទៅ ៤៩៤ ដុល្លារក្នុងមួយថ្ងៃ។ តាមរយៈការប្រើប្រាស់ឡផលិតហ្គាសជីវម៉ាស ខ្ញុំនៅអាចចំណេញប្រាក់ថែមទៀតជាមួយនឹងសកម្មភាពរបស់ខ្ញុំ បើទោះជាវាតម្រូវអោយខ្ញុំជ្រើសរើសកម្មករ៥នាក់បន្ថែម ដើម្បីផ្គត់ផ្គង់អង្កាមនៅក្នុងឡ»។ លោកត្រូវកាត់ប្រាក់ចំនួន១ ៣៩៥ ដុល្លារជារៀងរាល់ខែក្នុងរយៈពេល៥ឆ្នាំ ដើម្បីសងកម្ចីធនាគារដែលគាត់យកមកទិញសម្ភារៈនេះ ពីព្រោះថាកាលណាការសន្សំការចំណាយដោយសារប្រើម៉ាស៊ីននេះបានកាន់តែច្រើន ទឹកប្រាក់វិនិយោគធ្វើវាក៏ខ្ពស់ដែរ : គេត្រូវចំណាយ ៧ម៉ឺនដុល្លារ សម្រាប់ប្រព័ន្ធមួយដែលមានកម្លាំង ២០០ គីឡូវ៉ាត់។
ទោះយ៉ាងណា ទឹកប្រាក់នេះហាក់មិនបានធ្វើអោយថៅកែសហគ្រាសធុនតូច និងមធ្យមមួយចំនួនមានការរួញរានោះទេ។ លោករិន សីហា ប្រធានក្រុមហ៊ុន SME Renevable Energy ដែលធ្វើពាណិជ្ជកម្មប្រព័ន្ធផលិតនៅឥណ្ឌានេះនៅកម្ពុជា មានអតិថិជន៤នាក់នៅក្នុងខេត្តបាត់ដំបង សម្រាប់រោងម៉ាស៊ីនកិនស្រូវ ៤នាក់ទៀតនៅក្នុងខេត្តបន្ទាយមានជ័យក្នុងនោះអតិថិជនម្នាក់គឺទិញយកទៅផ្គត់ផ្គង់ភ្លើងអគ្គិសនីនៅក្នុងភូមិជនបទ ម្នាក់ទៀតនៅខេត្តសៀមរាបយកទៅប្រើសម្រាប់ផលិតទឹកបរិសុទ្ធ និងពីរនាក់ទៀតនៅខេត្តកំពង់ចាម យកទៅផលិតអគ្គិសនីសម្រាប់ប្រើប្រាស់នៅក្នុងផ្ទះ។ អ្នកផ្សេងទៀត ដែលទាក់ទាញដោយសារការបង្ហាញរបស់អតិថិជនដំបូងទាំងនេះ បានធ្វើការកុម្ម៉ង់រួចហើយនៅក្នុងខេត្តទាំងប៉ុន្មានខាងលើ និងនៅខេត្តកំពង់ឆ្នាំង ពោធិ៍សាត់ និងកណ្តាលផងដែរ។
ទាំងនេះធ្វើអោយលោករិន សីហា រីករាយយ៉ាងខ្លាំង។ ប៉ុន្តែបើតាមការគណនាដែលលោកបានបង្ហាញ អតិថិជនរបស់លោកក៏មានការរីករាយផងដែរ។ យោងតាមរូបលោក សហគ្រាសមួយអាចសន្សំសំចៃបាន ៦ ០០០ ដុល្លារក្នុងមួយខែសម្រាប់ការចំណាយប្រចាំខែទៅលើប្រេងម៉ាស៊ូតកាលពីមុនដែលមានចំនួនរហូតដល់ ៨ ០០០ ដុល្លារ។ ក្នុងករណីនេះ ការសងកម្ចី១ ៤០០ ដុល្លារក្នុងមួយខែ គឺវាគ្មានអ្វីបញ្ហាទេ។ ប្រធានក្រុមហ៊ុនរូបនេះលម្អិតទៀតថា៖ «ឡផលិតហ្គាសជីវម៉ាសមានតម្លៃប្រមាណ ៧៥ ០០០ ដុល្លារសម្រាប់សមត្ថភាព ២០០ គីឡូវ៉ាត់។ អ្នកទិញត្រូវចំណាយ ២០% មុនការដឹកជញ្ជូនទំនិញ ហើយគេអាចចំណាយទឹកប្រាក់ដែលនៅសល់ គេអាចបង់រំលួសប្រចាំខែក្នុងរយៈពេល៥ឆ្នាំ។ ឡផលិតហ្គាសនេះអាចប្រើប្រាស់បានយ៉ាងតិច៨ឆ្នាំដែរ»។
គុណសម្បត្តិផ្សេងទៀត ដែលត្រូវបានអ្នកលក់ និងអ្នកប្រើប្រាស់លើកឡើងនោះគឺ : ឡផលិតហ្គាសនេះមិនបំពុលបរិស្ថាន ព្រោះវាប្រើប្រភពថាមពលកកើតឡើងវិញដែលមនុស្សមិនបរិភោគឡើយ នោះគឺអង្កាម។ វាអាចជួយកាត់បន្ថយការបំភាយឧស្ម័នកាបូនិចថែមទៀត។ លោកប្រធានក្រុមហ៊ុន SME Renewable Energy វាយតម្លៃថា ឡផលិតហ្គាសជីវម៉ាសមួយអាចកាត់បន្ថយការប្រើប្រាស់ប្រេងឥន្ធនៈបាន១៨៤តោន ក្នុងមួយឆ្នាំ សម្រាប់ម៉ាស៊ីនមួយ ដែលប្រើប្រាស់ជាមធ្យមដប់ម៉ោងក្នុងមួយថ្ងៃ ២៥ថ្ងៃក្នុងមួយខែ និង១១ខែក្នុងមួយឆ្នាំ។ ពេលឆាប់ៗខាងមុខនឹងមានឡផលិតហ្គាសជីវម៉ាសចំនួន២០នៅកម្ពុជា វានឹងធ្វើអោយការប្រើប្រាស់ប្រេងសាំងថយចុះចំនួន១,៨លានលីត្រក្នុងមួយឆ្នាំ។ វាស្មើនឹងការបំភាយឧស្ម័នកាបូនិចប្រមាណ ៣ ៩០០ តោន។
តាមរយៈការដុតអង្កាម (អុស សម្បកសណ្តែកដី ឬសម្បកគ្រាប់ស្វាយចន្ទី) ដើម្បីបម្លែងជីវម៉ាសទៅជាហ្គាស់ ឡផលិតហ្គាសនេះ ឧស្ម័នកាបូនិច មិនត្រូវបានភាយទៅក្នុងបរិស្ថានទេ ដោយគេប្រើអាចម៍រណាអោយស្រូបយកផ្សែងខ្មៅទាំងនោះ នៅក្នុងផ្នែកមួយបិទជិតនៃឡ។
លោករិន សីហា លម្អិតថា៖ «នៅពេលយើងដុតអង្កាម ឬគ្រឿងចំហេះផ្សេងទៀតនៅក្នុងឡផលិតហ្គាសបិទជិត ឧស្ម័នអុកស៊ីសែន(O2) អាសូត(N2) និងអ៊ីដ្រូសែន (H2) ត្រូវស្រូបចូលតាមរន្ធតូចៗនៃឡ។ បន្ទាប់មក ទទួលបានឧស្ម័នកាបូនិច (CO2) ទឹក (H2O) និងល្បាយឧស្ម័ន ដែលប្រើសម្រាប់អោយម៉ាស៊ីនដំណើរការ។ ល្បាយឧស្ម័នទាំងនោះផ្សំឡើងដោយកាបូនម៉ូណូអុកស៊ីត(CO) អាសូត (N2) និងមេតាន(CH4)។ នៅចូលទៅក្នុងម៉ាស៊ីនភ្លើង ល្បាយឧស្ម័នទាំងនេះទៅជំនួសកន្លែងប្រេងម៉ាស៊ូត ហើយការប្រើប្រាស់ប្រេងម៉ាស៊ូតថយចុះជាបន្តបន្ទាប់។ ប្រសិនបើប្រព័ន្ធផលិតឧស្ម័នមានបញ្ហា ប្រេងម៉ាស៊ូតនឹងចូលខ្លួនមកជំនួសតាមធម្មតា»។ អង្កាម៦គីឡូអាចជំនួសសាំងបាន១លីត្រ ឬអុស៤គឺឡូ។
បច្ចុប្បន្ន បញ្ហានៅសល់គឺត្រូវឆ្លើយតបអោយបានឆាប់រហ័សទៅនឹងការបញ្ជាទិញរបស់អតិថិជនថ្មីៗ ដែលអាចនឹងមានចំនួនកើនឡើងថែមទៀតជាមួយនឹងការកើនឡើងនៃតម្លៃប្រេងម៉ាស៊ូត។ សព្វថ្ងៃ សហគ្រិនកម្ពុជាត្រូវអត់ធ្មត់រង់ចាំ១០០ថ្ងៃមុននឹងបានរីករាយជាមួយនឹងសម្ភារៈទាំងនេះ។ លោករិន សីហា មានបំណងចង់ទិញអាជ្ញាប័ណ្ណដែលអាចអោយលោកធ្វើការផលិតឡហ្គាសជីវៈម៉ាសទាំងនេះនៅកម្ពុជា។ «ម្ចាស់កម្មសិទ្ធិជនជាតិឥណ្ឌាលើប្រកាសនីយបត្រក្នុងការផលិតចង្រ្កាននេះនឹងមកកម្ពុជានៅខែក្រោយ។ ពួកយើងនឹងធ្វើការចរចាទិញអាជ្ញាប័ណ្ណ។ ការវិនិយោគនេះនឹងមានតម្លៃជិតកន្លះលានដុល្លារ ដោយមិនគិតពីទីតាំង» លោករិន សីហា វាយតម្លៃដូច្នេះ។ ដើម្បីទប់ទល់នឹងការចំណាយនេះ អាជីវកររូបនេះសង្ឃឹមថា លោកនឹងអាចបញ្ចុះបញ្ចូលសហគ្រាសធុនតូច និងធុនមធ្យម និងរដ្ឋាភិបាល អំពីសារប្រយោជន៍របស់សម្ភារៈថាមពលកកើតឡើងវិញនេះ។ លោកចង់អោយមានការបញ្ចុះពន្ធនាំចូលលើសម្ភារៈទាំងនេះ។
|
|
|
របបខ្មែរក្រហមនៅកម្ពុជាៈ យុវជនខ្មែរជឿត្រឹមតែ៥០%រឺ? (1)
