ឥន្ធនៈនៅពេលអនាគត
ដំណាំចំណីសត្វគឺជាវត្ថុធាតុដើមសែលុយឡូស ។ ការចម្រាញ់ជីវសាស្ត្រថ្មីៗ ។ កំណើនប្រាក់ចំណូលនៃកសិដ្ឋាន ។ ចំណីអាហារធ្វើពីត្រីមានតម្លៃថោក ។ ការស្រាវជ្រាវផ្នែកជីវថាមពលនាពេលបច្ចុប្បន្ននឹងមានឥទ្ធិពលលើឧស្សាហកម្មកសិកម្ម និងប្រភេទដំណាំទាំងអស់តាមវិធីជាច្រើន ។
មិនមែនគ្រាន់តែជាពាក្យសម្រាប់វិស័យជាក់លាក់មួយទេ “ការចម្រាញ់ជីវសាស្ត្រ” គឺជាឧស្សាហកម្មដ៏មានសារៈសំខាន់មួយសម្រាប់សហរដ្ឋអាមេរិចតាំងតែពីសម័យសង្គ្រាមលោកលើកទី២ នៅពេលដែលការស្រាវជ្រាវរបស់សេវាកម្មស្រាវជ្រាវកសិកម្ម (ARS) ជួយផ្ដល់នូវវត្ថុធាតុដើមសម្រាប់ផលិតអេតាណុលដើម្បីគាំទ្រដល់ការធ្វើចម្បាំង ។ ការស្រាវជ្រាវរបស់ភ្នាក់ងារនេះមិនបានបញ្ឈប់នៅត្រឹមហ្នឹងទេ ហើយ ARS នៅតែបន្តឈានមុខនៅក្នុងការស្រាវជ្រាវផ្នែកជីវថាមពល ។
បច្ចុប្បន្ន ផលិតផលថ្មីៗកំពុងតែបញ្ចេញលក់នៅលើទីផ្សារ ។ ការស្រាវជ្រាវអំពីថាមពលជំនួស (ប្រេងឥន្ធនៈបានមកពីរ៉ែ) មានសន្ទុះឈានឡើង ។ អ្នកវិទ្យាសាស្ត្រនៅទូទាំងប្រទេសអាមេរិចកំពុងតែអង្កេតអំពីវិធីដើម្បីបង្កើនការអភិវឌ្ឍន៍សេនេទិច ផលិតកម្មប្រកបដោយចេរភាព និងការបំប្លែងជីវឥន្ធនៈពីវត្ថុធាតុដើម (បានមកពីកសិកម្ម) នៅក្នុងវិធីដែលកម្រិតជាអប្បរមានូវផលប៉ះពាល់នៃផលិតផលថ្មីទាំងនេះទៅលើតម្លៃ និងអត្ថិភាពនៃម្ហូបអាហារ ។
ឧទាហរណ៍ ARS កំពុងតែឈានមុខក្នុងការស្រាវជ្រាវអំពីសារធាតុភ្នាសកោសិកាដែលជាប្រភពថាមពលអាចកកើតឡើងវិញដែលមានចំនួនច្រើន និងមិនមែនជាចំណីអាហារ ។ សែលុយឡូស Lignin និងសមាសធាតុដទៃទៀតនៃភ្នាសកោសិការុក្ខជាតិមាននៅក្នុងដើមពោត និងសំណល់រុក្ខជាតិផ្សេងៗទៀត ចំបើងស្រូវសាឡី កាកសំណល់ចំណីអាហារ និងស្មៅរស់បានយូរ ដូចជា ស្មៅSwitchgrass ។ ស្មៅដ៏ខ្លាំងមានដើមកំណើតនៅអាមេរិចខាងជើងនេះគឺជាប្រធានបទនៃគម្រោងស្រាវជ្រាវជាច្រើនរបស់ARS ។ នៅក្រុង Albany រដ្ឋ California អ្នកវិទ្យាសាស្ត្រកំពុងតែបញ្ជាក់ពីដំណាក់កាលបន្តបន្ទាប់រាប់ពាន់ឆ្នាំនៃបំណែកសែនរបស់ Switchgrass ដើម្បីស្វែងរកលក្ខណ៍ដ្ឋានមានប្រយោជន៍ ។ នៅក្រុង Lincoln រដ្ឋ Nebraska អ្នកវិទ្យាសាស្ត្រកំពុងតែអភិវឌ្ឍន៍ពូជថ្មីៗសមស្របនឹងលក្ខខណ្ឌផលិតកម្មខុសៗគ្នា ។ នៅក្រុង Madison រដ្ឋ Wisconsin អ្នកវិទ្យាសាស្ត្រកំពុងកំណត់អត្តសញ្ញាណសែន និងយុទ្ធសាស្ត្រដើម្បីបង្កាត់ Switchgrass ដែលមានប្រសិទ្ធភាពជាងមុនសម្រាប់ផលិតកម្មជីវឥន្ធនៈ ។ នៅសាកលវិទ្យាល័យ Park រដ្ឋ Pennsylvania អ្នកវិទ្យាសាស្ត្រកំពុងតែវាយតម្លៃពីផលប្រយោជន៍ផ្នែកបរិស្ថាននៃស្មៅ Switchgrass ។ នៅក្រុង Peoria រដ្ឋ Illinois អ្នកវិទ្យាសាស្ត្រកំពុងកំណត់អត្តសញ្ញាណមីក្រុបដែលអាចបង្កើនការបំប្លែង Switchgrass ទៅជាជីវឥន្ធនៈ ។
ARS កំពុងតែអង្កេតជម្រើសប្រកបដោយសក្ដានុពលជាង១០ផ្សេងទៀត រួមមាន ប្រភេទស្មៅផ្សេងៗ Alfalfa និង ស្រូវបាឡេ ហើយនិងអនុផលពីផលិតកម្ម និងការកែច្នៃកសិកម្ម ដូចជា លាមកសត្វ និងសំបកក្រូច ផងដែរ ។ កិច្ចប្រឹងប្រែងសហប្រតិបត្តិការទាំងនេះនឹងជួយធ្វើឲ្យប្រាកដថា អ្នកចម្រាញ់ជីវសាស្ត្រមានវត្ថុធាតុដើមដ៏សម្បូរបែបក្នុងការផលិតជីវឥន្ធនៈ ។
ទោះបីជាការស្រាវជ្រាវភាគច្រើនរបស់ ARS ទាក់ទិនតែនឹងដំណាំ និងប្រភេទពូជដំណាំជាក់លាក់ក៏ដោយ ក៏ ARS បានរួមបញ្ចូលភាពជឿនលឿននៃវិទ្យាសាស្ត្រ និងបច្ចេកវិទ្យាផ្សេងៗដែលអាចផ្ដល់ផលប្រយោជន៍ការពិតដល់ការស្រាវជ្រាវប្រភេទពូជដំណាំផ្សេងៗទៀត ។ អ្វីដំណើរការល្អនៅក្នុងកសិដ្ឋានតូចមួយនៅរដ្ឋ Pennsylvania អាចនឹងមិនដំណើរការនៅក្នុងកសិដ្ឋានធំនៅរដ្ឋ California ទេ ។ ការបញ្ជាក់ថាតើដំណាំណាមួយគួរដាំនៅក្នុងតំបន់ជាក់លាក់ណាមួយនៅក្នុងប្រទេស ការកំណត់អត្តសញ្ញាណការអនុវត្តល្អបំផុតសម្រាប់ការដាំដំណាំ និងការជ្រើរើសលក្ខខណ្ឌចម្រាញ់ជីវសាស្ត្រល្អបំផុត គឺឆ្លុះបញ្ចាំងពីយុទ្ធសាស្ត្រជាប្រព័ន្ធនៃការស្រាវជ្រាវរបស់ ARS ។
ការសិក្សាដូចនេះ ធ្វើឲ្យដំណោះស្រាយឥន្ធនៈជំនួសអាចធ្វើទៅបានចំពោះកសិដ្ឋាន និងតំបន់ជាក់លាក់ ដែលធ្វើឲ្យផលិតកម្មកាន់តែមានប្រសិទ្ធភាព ទទួលបានប្រាក់ចំណេញបន្ថែម និងប្រកបដោយចេរភាព ។
ពហុផលិតផលបានមកពីការចម្រាញ់ជីវសាស្ត្រជំនាន់ថ្មីក៏បានកើតឡើងចេញពីការស្រាវជ្រាវជីវឥន្ធនៈរបស់ ARS ផងដែរ ។ ផលិតផលទាំងនេះកំពុងតែបង្កើតកាលានុវត្តភាពគួរឲ្យចាប់អារម្មណ៍សម្រាប់វិស័យកសិកម្ម ។ ឧទាហរណ៍ដ៏ឆ្នើមមួយគឺ Glycerol ជាពហុផលិតផលនៃផលិតកម្មជីវម៉ាស៊ូត ។ អ្នកស្រាវជ្រាវនៃ ARS នៅមជ្ឈមណ្ឌលស្រាវជ្រាវភូមិភាគខាងកើត នៅក្រុង Wyndmoor រដ្ឋ Pennsylvania បានរកឃើញសក្ដានុពលមិនអាចកាត់ថ្លៃបាននៃការប្រើប្រាស់ Glycerol ដូចជា នៅក្នុងផលិតកម្ម Polyester bio-polymers ដែលអាចប្រើជាផ្លាស្ទិច ឬជាធាតុស្អិត ។ ចំណែកឯពហុផលិតផលថ្មីៗ ដូចជាប្រេងចម្អិនម្ហូប សារធាតុបន្ថែមម្ហូបអាហារ និងចំណីវារីវប្បកម្ម នឹងលើកស្ទួយប្រាក់ចំណេញនៃការចម្រាញ់ជីវសាស្ត្រនាពេលបច្ចុប្បន្ន និងអនាគត ។
ការស្រាវជ្រាវពីផលិតកម្មវត្ថុធាតុដើមរបស់ ARS គឺដើម្បីធ្វើឲ្យល្អប្រសើរនូវបរិមាណ និងគុណភាពនៃវត្ថុធាតុដើមសម្រាប់ការចម្រាញ់ជីវសាស្ត្រ ដូច្នេះទាំងកសិករ និងអ្នកបំប្លែងនឹងទទួលបានប្រាក់ចំណេញ ។ ARS បានអភិវឌ្ឍន៍ឧបករណ៍សម្រាប់ជួយកសិករ និងអ្នកប្រតិបត្តិការចម្រាញ់ជីវសាស្ត្រធ្វើការបណ្ដាក់ទុនវិនិយោគ ហើយការស្រាវជ្រាវរបស់ ARS កំពុងតែបង្កើតឧបករណ៍ និងវិធីសាស្ត្រដោយធ្វើឲ្យគុណប្រយោជន៍សេដ្ឋកិច្ចនៃជីវឥន្ធនៈអតិបរមា ហើយជាមួយគ្នានេះក៏បានការពារដី ខ្យល់ និងធនធានទឹករបស់យើងផងដែរ ។
អ្នកវិទ្យាសាស្ត្ររបស់ ARS ក៏កំពុងតែកំណត់ពីវិធីសាស្ត្របំប្លែងដែលដំណើរការល្អជាមួយដំណាំជាក់លាក់ និងកំពុងតែកំណត់អត្តសញ្ញាណប្រព័ន្ធផលិតកម្មវត្ថុធាតុដើមដើម្បីឲ្យបានផលចំណេញអតិបរមា និងមាននិរន្តរភាព ។ ការស្រាវជ្រាវរបស់ ARS បានអភិវឌ្ឍន៍ឧបករណ៍ និងវិធីសាស្ត្រនានាដើម្បីពន្លឿនដំណើរការបំប្លែង ដែលធ្វើឲ្យតម្លៃផលិតកម្មទាប ។ ឧទាហរណ៍ ថ្មីៗនេះ ARS បានស្រាវជ្រាវដើម្បីអភិវឌ្ឍន៍ឧបករណ៍ញាណ (Sensor) ដើម្បីតាមដានការបប្លែងនៃ Xylose និង Arabinose ជាស្ករ២ប្រភេទដែលមាននៅក្នុងជីវម៉ាសសម្រាប់បប្លែងទៅជាអេតាណុល ។
ARS កំពុងតែពង្រីកការអង្កេតស្រាវជ្រាវរបស់ខ្លួនដើម្បីស្វែងរកជម្រើសឥន្ធនៈដែលមានមូលដ្ឋានពីកសិដ្ឋានដែលអាចជួយសម្រាលការពឹងផ្អែករបស់សហរដ្ឋអាមេរិចទៅលើការនាំចូលប្រេងពីបរទេស និងកាត់បន្ថយការបញ្ចេញនូវឧស្ម័នផ្ទះកញ្ចក់ទៅក្នុងបរិយាកាស ។ ទិសដៅចម្បងរបស់ផ្នែកជីវថាមពល និងថាមពលជំនួស នៃ ARS គឺផ្សព្វផ្សាយនូវបច្ចេកវិទ្យា និងផលិតផលកសិកម្មដែលអាចផលិតជាជីវថាមពលប្រកបដោយប្រាក់ចំណេញ និងប្រកបដោយចេរភាពពីធនធានមិនចំណីអាហារដែលអាចកកើតឡើងវិញ ។
ដោយមានអ្នកជំនាញនៅក្នុងបរិបទវិទ្យាសាស្ត្រពាក់ព័ន្ធទាំងអស់ ARS មានតួនាទីពិសេសក្នុងការរួមបញ្ចូលនូវភាពជឿនលឿននៃវិទ្យាសាស្ត្រដែលត្រូវការនៅក្នុងការអភិវឌ្ឍន៍វត្ថុធាតុដើម ផលិតកម្មវត្ថុធាតុដើម និងការចម្រាញ់ជីវសាស្ត្រ ដូច្នេះផលិតកម្មជីវឥន្ធនៈគឺមាននិរន្តរភាពទាំងផ្នែកសេដ្ឋកិច្ច និងផ្នែកបរិស្ថាន ។ ហើយការពិតដែល ARS មានទំនាក់ទំនងយ៉ាងជិតស្និទជាមួយមនុស្សនៅក្នុងវិស័យឧស្សាហកម្មម្ហូបអាហារ និងកសិកម្មទូទាំងសហរដ្ឋអាមេរិច មានន័យថា ARS នឹងផ្ដោតការស្រាជ្រាវដែលអាចរួមបញ្ចូលដ៏ត្រឹមត្រូវនូវផលិតកម្មជីវឥន្ធនៈទៅក្នុងវិស័យកសិកម្ម ។
ការស្រាវជ្រាវនេះនឹងជួយបង្កើតកាលានុវត្តភាពការងារ និងស្របពេលជាមួយគ្នាបន្ថយសម្ពាធទៅលើការបំពុលបរិស្ថាន ។ ARS សង្ឃឹមថាកសិករ ឧស្សាហករ និងអ្នកប្រើប្រាស់អាមេរិចនឹងទទួលបាននូវផលប្រយោជន៍ដ៏សម្បើមនេះ ។ អត្ថបទដោយ Bob Fireovid
បកប្រែ និងផ្សព្វផ្សាយដោយមានការអនុញ្ញាតពី USDA (Agricultural Research/Oct 2008)