ရခိုင်ပြည်နယ်တွင် လျှပ်စစ်ဓာတ်အား မဂ္ဂါဝပ် ၂၆၀ ကျော် ထုတ်လုပ်ဖြန့်ဖြူး သွားနိုင်ရန်အတွက် အမေရိကန်ဒေါ်လာ သန်းပေါင်း ၄၀၀ ကျော်ဖြင့် အကောင်အထည်ဖော် ဆောင်ရွက်သွားရန်ရှိကြောင်း လျှပ်စစ်စွမ်းအားဝန်ကြီးဌာနမှ သတင်းရရှိသည်။

စစ်တွေ၊ ကျောက်ဖြူနှင့် ပုဏ္ဏားကျွန်းမြို့နယ်များတွင် တည်ထောင်ဆောင်ရွက်မည့် အဆိုပါ လျှပ်စစ်ဓာတ်အား ထုတ်လုပ်ရေး လုပ်ငန်းများအား  ၀န်ကြီးဌာနက တာဝန်ယူဆောင်ရွက်မည် မဟုတ်ဘဲ ပုဂ္ဂလိကကုမ္ပဏီများက ဆောင်ရွက်သွားမည်ဖြစ်ကြောင်း၊ ယင်းစီမံကိန်းများတွင် စပါးခွံဓာတ်ငွေ့ ဓာတ်အားပေးစက်နှင့် ဂျပန်နည်းပညာ Solar Farm ဖြင့် လျှပ်စစ်ဓာတ်အား ထုတ်လုပ်တပ်ဆင်ခြင်းများလည်း ပါဝင်ကြောင်း သိရသည်။

လျှပ်စစ်ဓာတ်အား အဓိကထုတ်လုပ်မည့် စီမံကိန်းများမှာမူ ကျောက်ဖြူ ကမ်းလွန်သဘာဝ ဓာတ်ငွေ့သုံး ဓာတ်အားပေးစက်ရုံမှ မဂ္ဂါဝပ် ၂၀ နှင့် ကျောက်ဖြူ သဘာဝဓာတ်ငွေ့သုံး ဓာတ်အားပေးစက်ရုံမှ မဂ္ဂါဝပ် ၁၀၀ ဖြင့် အသီးသီး ထုတ်လုပ်သွားမည်ဖြစ်ကြောင်း အဆိုပါဝန်ကြီးဌာနက ထုတ်ပြန်သည်။

ကျောက်ဖြူ ကမ်းလွန်သဘာဝဓာတ်ငွေ့ ဓာတ်အားပေးစက်ရုံအား ကန်ဒေါ်လာ သန်း ၂၁၀ ခန့်ဖြင့် Zeya & Associates ကုမ္ပဏီကလည်းကောင်း၊ ပုဏ္ဏားကျွန်း ကျောက်မီးသွေး လျှပ်စစ်ဓာတ်အားပေး စက်ရုံအား ရိုးမပါဝါကုမ္ပဏီက ကန်ဒေါ်လာ သန်း ၆၀ ခန့်ဖြင့်လည်းကောင်း၊ ကျောက်ဖြူ (100 MW) Gas Turbine Power Plant အား Hexa Int'l, Daewoo Int'l ကုမ္ပဏီက ဒေါ်လာသန်း ၁၂၀ ခန့်ဖြင့်လည်းကောင်း၊ Solar Farm ဖြင့် လျှပ်စစ်ဓာတ်အား ထုတ်လုပ်တပ်ဆင်ခြင်းကို Nile စက်မှုကုမ္ပဏီနှင့် မစ်ဆူမီရှီဆိုလာကုမ္ပဏီ(ဂျပန်)တို့က တစ်ယူနစ်လျှင် ၀ ဒသမ ၂၅ ဒေါ်လာနှုန်းဖြင့် ဆောင်ရွက်သွားမည်ဖြစ်သည်။

အထက်ပါ စီမံကိန်းများအတွက် နေပြည်တော်ရှိ လျှပ်စစ်စွမ်းအားဝန်ကြီးဌာနတွင် စက်တင်ဘာ ၂၁ ရက်က ကျင်းပခဲ့သော ပြည်တွင်း၊ ပြည်ပ ရင်းနှီးမြှုပ်နှံမှု ဖိတ်ခေါ်ဆွေးနွေးပွဲ၌ ဆွေးနွေးခဲ့ခြင်းဖြစ်ကြောင်း သိရသည်။