ဝတ္ထု မိကောန်ပၠီ ကောန်ဗြဴ အနာဲဗာန် ကေုာံ မိလီစၞာဲ
နူကဵုလိခ်သၠပတ်မန် တြေံတြဟ်

(၁)

ပ္ဍဲကာလမတုဲတေံ သၟိင်ဇၞော်အလွိဂှ် ပကင်ရင်လဝ်ဍုင်မွဲမနွံယၟုအလွိရ၊ သၟိင်အလွိဂှ်နွံကဵု ကြဳဇှ်ဇၞော်တဴ ဗွဲမလောန်ရ၊ ပ္ဍဲဍုင်အလွိဂှ် ဂကူမၞိဟ်ကၠံမွဲဘာသာ ပဒတဴဒၟံင်တုဲမပ္တံကဵု သတ်တိရစ္ဆာန်သတ်ဇိုင်ၜါ သတ်ဇိုင်ပန်တံဂှ်လေဝ် ဂၠိုင်ဗွဲမလောန်ရ၊ သြောံသ္ၚုတံပၠန်လေဝ် ပေင်ဟင်ပေင်ဟဝ်ရ၊ ဟိုတ်ဂှ်ရ ဨကရာဇ်ကီု သီုကဵုကောန်ဍုင်ကောန်ကွာန်တံဂှ် ရာနွံပၟိက်ဂှ်ဍိုက်ပေင်ဒၟံင်ဖအိုတ်တုဲ ဍုင်ဇၞော်မိပ်ဇြိပ်ရာင်ဆာဲ ဗွဲမလောန်ရ။
	ပ္ဍဲကဵုဇရေင်ဍုင်အလွိဂှ် ဥဒျာန်မွဲနွံတဴရ၊ ပ္ဍဲဥဒျာန်ဂှ် တြုံကဵုဗြဴညးဒိုက်ဂတ်ၜါတၠဂှ် တဵုပလမ်လဝ် သၞေဝ်ကေဝ်ရ၊ ညးၜါဂှ်နကဵုသွံရာန်သၞေဝ်ကေဝ်တုဲ ဂယိုင်တဴလမျီုရ၊ ညးၜါတြုံကဵုဗြဴဂှ် မၞိဟ်တြုံဂှ်မနွံယၟု အနာဲဗာန် တုဲမၞိဟ်ဗြဴဂှ် ညးကော်ခဴစ မိလီစၞာဲ ရ၊ ပ္ဍဲကၠအ်ဥဒျာန်ညးတံဂှ် တၞံသၞေဝ်ကေဝ်တဵုလဝ်မပ္တံကဵု လဵုတံ ခပဳတံ ဂအဳတံဂှ် သတ်တဴ ဗွဲမလောန်ရ၊ ဟိုတ်ဂှ်ရ ညးတံသြန်လုပ်ခိုဟ်ဒၟံင်လၟိုန်ရ။
	ညးၜါတြုံကဵုဗြဴဂှ် ကောန်ဇာတ်မွဲရောဟွံကလိဂွံရ၊ သွက်ဂွံဂွံကောန်ဇာတ်ဂှ်လေဝ် သ္ပလွဳဒၟံင်ဒၟံင်ကီုရ၊ တြုံကဵုဗြဴညးၜါဂှ် ပြာပ်အာဒဵုပ္ဍဲတၞံဆုဇၞော်ဇၞော်တုဲအာတ်တဴကောန်ဇာတ် ပ္ဍဲဇရေင်ဒေဝတဴတံရ၊ ညးတံဂှ် ဟိုတ်နွံပၟိက်ကဵုကောန်ဇာတ်တုဲဇဖန်မအာတ်တဴဒးကာလမွဲဗ္တံ မိလီစၞာဲဂှ် စံက်ဂးဏံ ဂွံနိမိတ်လ္ပအ်ဂွံစကွာင်ဂွဳရဂး၊  ဂွံနိမိတ်လ္ပအ်တုဲလကိုတ်ၚုဟ်အာရ၊ ဒဒှ်ရ ဇကုလ္ပအ်ညာတ်ဂွံစကွာင်ဂွဳဂှ်ဇဖန်ဂှ် လဴထ္ၜးကဵုတၠသ္ၚိဇကုရ။
	အနာဲဗာန်ဂှ်လေဝ် သမ္ဘာဇကုလ္ပအ်ညာတ်ဂွံစကွာင်ဂွဳဂှ် နိမိတ်ဏံဒှ်နိမိတ်ခိုဟ်ရ၊ ဒှ်နိမိတ်ကလိဂွံ ကောန်ဇာတ်ဏောင် ထေင်ခယျကေတ်တုဲလဴဗစကုသမ္ဘာဇကုရ၊ ယွံ မဂဳလ္ပအ် ဗှ်ေဂှ်နိမိတ်ခိုဟ်မံင် ၊ သီု မိပ်စိုတ်ပူမှ်ကတဵုဒှ် ပဳတိတုဲဟီုထ္ၜးကုသမ္ဘာဇကုရဴသာ်ဝွံရ၊ ကာလဂှ် ညးမဒှ်သမ္ဘာ မိလီစၞာဲလေဝ် အိုဟ်တၟိုဟ် မိပ်တဴစိုတ်ဗွဲမလောန်ရ၊ ဂွံနိမိတ်လ္ပအ်သာ်ဂှ်တုဲဂိတုတ္ၚဲဟွံလံ မိလီစၞာဲဂှ် ကလိဂွံဂဗ္ဘရ၊ ဟိုတ်ဂှ်ရ တြုံကဵုဗြဴ ညး ၜါဂှ် ပ္ဍဲစိုတ်ညးတံကတဵုဒှ်သဘင်ကျာ်ရ။
	မိလီစၞာဲဂှ်လေဝ် ကောန်ၚာ်တန်ဒၟံင်ပ္ဍဲပဋိသန္ဓိပ္ဍဲဂဝ်ဂၞဴဂှ် ကောန်တြုံတြုံဟာကောန်ဗြဴဗြဴဟာ မိက်ဂွံတီ ပၠန်ရဂး၊ ဟိုတ်ဂှ်ရ ပြာပ်အာဇရေင်အာစာဗမၞးပြောဟိတ်တုဲသၟာန်တဴဗေဒင်ရောင် ဂးကဵုတြုံတၠသ္ၚိညးရ၊ အနာဲဗာန်လေဝ်ဗက်အလိုက်သမ္ဘာဇကုတုဲသၠးကဵုအခေါင်ကုသမ္ဘာဇကုရ၊ မိလီစၞာဲဂှ် အတိုင်အခိုက်ကၞာ ခါန်တဲသွက်ဂွံပူဇဴအာစာဗမၞးပြောဟိတ် ဂးတုဲအာရာန်နင် မပ္တံကဵုဇဗၠုသတ်တံရ၊ ပြေင်ခါန်တုဲ မိလီစၞာဲဂှ် ပြာပ်အာဇရေင်သ္ၚိအာစာဗမၞးပြောဟိတ်ရ၊ စိုပ်သ္ၚိအာစာဗမၞးမ္ဂးအာစာဗမၞးသၟာန်တဴရ ကာလဂှ် မိလီစၞာဲဂှ် -
	ယွံ အာစာအဲကလိဂွံဂဝ်ဂၞဴလၟုဟ်ဏံဂှ် ကောန်တြုံဟာ ကောန်ၚာ်ဗြဴဟာ မိက်ဂွံတီတုဲပြာပ်ကၠုင်ရံင်စ ပ္ဍဲဇရေင်အာစာရ၊ ရဴသာ်ဝွံ ဂးတုဲမွဲသာ်ပၠန်ကောန်ၚာ်ကြက်ကတဵုဒှ် မၞိဟ်ဏံဂှ်လေဝ် သွက်ပိုဲဒှ်ဂုဏ်ဖိုလ်ဟာ ဟွံ ဒှ်ဂုဏ်ဖိုလ်ဟာဂှ်လေဝ်မိက်ဂွံတီကီုရ၊ ဟိုတ်ဂှ်ရ အာစာဂၞန်တးကဵုညိအာစာ ။
	ရဴသာ်ဝွံ မိလီစၞာဲ ဂးတုဲအာစာဗမၞးဂှ်လေဝ် ဂၞန်တးဗေဒင်ဟောရာတုဲဟီုထ္ၜးကဵု မိလီစၞာဲရ၊
	ကောန်ၚာ်တန်ဒၟံင်ပဋိသန္ဓိပ္ဍဲဂဝ်ဂၞဴ မိလီစၞာဲဂှ် ဂွံစကွာင်ဂွဳဂွံသွပ်လ္ပအ်သာ်ဂှ် ဟီုမ္ဂး ကလိဂွံကောန်မ္ဂး ကောန်ၚာ်ဂှ် ညာဏ်ပညာခိုဟ်တုဲ ဒှ်ကောန်ဗြဴရ၊ ဇၟာပ်ညးမဆဵုညာတ် သ္ဍိုက်ဆာန်ရောင်၊ အရေဝ်စၞာဲ ကောန်ၚာ်ဗြဴမဟီုဏာဂှ် ဇၟာပ်ညးမမိင်ပတှ်ေတဴရောင်၊ ပဟိုတ်နူကဵုအရေဝ်ဒှ်ဂုဏ်ဖိုလ်ရောင်၊ ရဴသာ်ဝွံ အတိုင် တဝှ်ဗေဒင်ဂှ်ဟွံညှာဒညဟီုတွံဏာရ၊ မိလီစၞာဲလေဝ် တင် (အတိုင်) အာစာဗမၞးတော်ထ္ၜးဟီုပျးဏာဂှ် ဂွံမိင် ကေတ်တုဲ သီုစိုတ်မိပ်မြဟ်ကလံကုအာစာဗမၞးတုဲစဴအာရ။
	အနာဲဗာန်လေဝ် မိလီစၞာဲ ကလေင်စဴစိုပ်ကၠုင်သ္ၚိတုဲပရောပရာအတိုင်အာစာဗမၞး တွံလဝ်ဗေဒင်ဂှ် သၟာန်တဴကု မိလီစၞာဲဂှ် အတိုင်အာစာဗမၞးတွံလဝ်ဂှ် ကလေင်လဴထ္ၜးကဵုရ၊ အနာဲဗာန်ဂှ် ဂွံမိင်တုဲမိပ်မြဟ် အိုဟ်တၟိုဟ်စိုတ်ဗွဲမလောန်ရ။
	မိလီစၞာဲဂှ် မင်မွဲဒၟံင်ပဋိသန္ဓိဂှ်ဗွဲမဒးရးရ၊ ကာလပေင်တဴကၠုင်ဒစိတ်ဂိတုဒစိတ်တ္ၚဲဂှ် သၠးဂဗ္ဘကလိဂွံ ကောန်ရတ်ဗြဴဗြဴမွဲရ၊ ကောန်ၚာ်ဗြဴဍောတ်ဂှ် ရုပ်သာ်ကျေဝ်ဂေါဝ်လ္ပကဵုဒးဟီုရ၊ ဟိုတ်ဂှ်ရ အနာဲဗာန်လေဝ် မိပ်သၠောင်၊ မိလီစၞာဲလေဝ် မိပ်သၠောင်တဴရ၊ မင်မွဲလွဳပရာမြိမြန်ကုကောန်ၚာ်ဗြဴဂှ် ဂမိတ်ရောကွဵုကိတ် ဂဂိတ် ရောကွဵုစတ် ရုဲလေဝ်ဟွံကဵုဍုန်ရ။
	ကြဴဝွံ အကွက်ကောန်ၚာ်ဗြဴသၟတ်ဂှ် ဂွံခၞံဇာတာကီုဂွံခုတ်ယၟုကီု အနာဲဗာန် ပြာပ်အာ ဇရေင်အာစာဗမၞးဇၞော်ရ၊ ကေတ်ဏာအပေါတ်ပူဇဴနကဵုလှိုင်ရ၊ ဗမၞးဇၞော်လေဝ် သၟာန်တဴ ဟိုတ်ဖိုလ်ကုအနာဲဗာန်တုဲ အနာဲဗာန်ဂှ်ဂးရ။
	အဲကၠုင်လၟုဟ်ဝွံ သွက်ဂွံခၞံဇာတာကေုာံသွက်ဂွံတင်ခုတ်ယၟုကောန်ၚာ်ဗြဴရဂးတုဲ ဗမၞးဇၞော်ဂှ် တော်ဂၞန်တး ခၞံဇာတာ ကောန်ၚာ်ဗြဴဂှ်တုဲခုတ်တင်ကဵုယၟုကောန်ၚာ်ဗြဴဂှ်  မိကောန်ပၠီရ၊ အနာဲဗာန်ဂှ်လေဝ် ဂွံဇာတာကောန်ၚာ်ဗြဴကေုာံယၟုကောန်ၚာ်ဗြဴဂှ်တုဲစဴကၠုင်သ္ၚိရ၊ အနာဲဗာန်စိုပ်ကၠုင်သ္ၚိမ္ဂး မိလီစၞာဲဂှ် သၟာန်တဴ ကုတၠသ္ၚိဇကုရ၊ အနာဲဗာန်ဂှ် အာစာဗမၞးဇၞော်ဂှ် ဒဒှ်ရ ခုတ်စွံယၟု မိကောန်ပၠီ ရောင်ဂှ် ဟီုထ္ၜးကဵုရ၊ မိလီစၞာဲလေဝ် သ္ဂောံမိင်ကေတ်တုဲ မိပ်မြဟ်စိုတ်ဗွဲမလောန်ရ။
	မိကဵုမၜါမြိမြန်လွဳပရာကုကောန်ၚာ်ဗြဴသၟတ်ရဴသာ်ဝွံ ကောန်ၚာ်ဗြဴသၟတ်ဂှ် ဇၞော်ဂေါဝ်ကၠုင် သိုက်က်ရ၊ ပေင်တဴကၠုင်အဝဲအယုက် (၄) သၞာံဒှ်ရ၊ ကာလဂှ် အနာဲဗာန်ဂှ် ကတဵုဒှ်ယဲဝေဒနာ ဗွဲမသ္ကာတ်မြဟ်ရ၊ မိလီစၞာဲလေဝ် အတိုင်ဝတ်သမ္ဘာမ္ဒးပ္တုဲလ္တူတၠသ္ၚိ နကဵုဂဥုဲ နာနာ ဖျုင်ဗစတဴ ကီုလေဝ် ယဲဂှ်ဟွံသက်သာရ၊ မွဲတ္ၚဲခိုဟ်မွဲတ္ၚဲယဲဂှ်က္ဍင်ကၠုင်က္ဍင်ကၠုင်ရ၊ စစၞ ဟွံလုပ်မသုန်တြဴတ္ၚဲ တုဲဒးပကာဂစိုတ်ရ၊ မိလီစၞာဲလေဝ် ယာံဂတေဝ်ကရဳကရောတ် ရိုဟ်ရေင်နာနာသာ်ရ။
	ယွံ နာဲပိုဲ အဲဍိက်ဗြဴကလိဂွံကောန်ၚာ်ဗြဴတုဲမှ နာဲပိုဲဒဴထောံပိုဲ ပၠေဲစွံလဝ်ပိုဲ ပ္ဍဲလောကဏံဟာ၊ ကောန်ဗြဴသၟတ်ရုပ်ညံင်ထဝ်ထၞောတ် ကျေဝ်ဂေါဝ်ၜတ်သဴ ဟွံဆာန်ဂိုဟ် မွဲသာ်ဒဴထောံပိုဲဂှ် ဒဇန်ကွေံသွံဏး၊ အဴယွံ နာဲပိုဲ ဆာန်ကၟိန်နာဲပိုဲတုဲ ပံင်ဖက်ကၠုင် ကောန်ဇာတ်ရောဂွိုအ်၊ မံင်တဴကၠုင်ဂြိုပ်ဂၠိုင်ကဵုသၞာံ၊ ကာလဂွံကောန်ဗြဴလၟုဟ်တုဲမှ ပဲါဒဴအာ ထောံနူပိုဲဂှ် ဟွံဆာန်ဍူပိုဲရဟာ၊ အဴနာဲပိုဲ နာဲပိုဲကဵုအဲဍိက်ဗြဴဏံ သၟန်ပါင်ခၞံင် အရေဝ် ထေဲကြံင်မ္ၚိုဟ်ဂှ် မွဲဝါရောဟွံဂွံဟီု၊ ဆာန်တုဲ ပံင်မံင်ကၠုင်ညဳညဳသာသာ ခါလၟုဟ် ဒွိင်ဖေက် ဒးဂၠဲါဗစကောန်ကဵုသမ္ဘာတုဲပဲါဒဴထောံပိုဲဟာ နာဲပိုဲ။
	အဴ ယာဲ ကျာ် ဓရ် သင် ဃောကၠာဆာန်ကၠုင်ညးသ္ကံတေံ နာဲပိုဲကဵုအဲဍိက်ဗြဴ ချိုတ်မွဲကတိုင်ဂျိုင်မွဲထကဝ် ဂွံသ္တိက်မွဲဂၞဳကီုရလေဝ် ခါလၟုဟ်ဏံ ညးမွဲဓဝ်ဒးသ္တိက်သၠိင်မွဲလစုတ် ၚုဟ်မွဲခဏ ဇြက်ပရောဟွံမွဲ၊ ၚုဟ်တိုန်ပၠန်လေဝ် ဟွံဆဵုမုခ်နာဲပိုဲ အောန်စိုတ်သိင်သာ ဒှ်လၞီလၞာ် ဗြဲဍာ်ရမတ်ဒးဂူမံင်ရိုဟ်တ္ၚဲရ နာဲပိုဲ၊ အဴ ဒဒိုက်စိုတ်အဲဍိက်ဗြဴကၠုင်ဗဵုညိ နာဲပိုဲ။
	အဴ ဟိုဲ နာဲပိုဲ လ္တူနာဲပိုဲအဲဍိက်ဒေံဗြဴဏံဒှ်ဓရ်စံင်တူသောက ဍာ်ရမတ်ကင်ကဳ ညာတ်မုခ်ကောန်ဗြဴပၠန်လေဝ် ဒဒှ်ရ နာဲပိုဲပၠေဲထောံလဝ်ကောန်ကဵုယာဲနဒဒှ်ဗြဴကၟာဲဏံဒဇန် လောန်ကွေံရသွံ၊ ချပ်ဗှ်သိင်သာ ဂၠဲါစုတ်စၞးနာဲပိုဲဂွံဟွံသေင်ရ နာဲပိုဲ။
	ယွံလေဝ် နာဲပိုဲ နာဲပိုဲကရဴတောံစးကဵုပိုဲတုဲရံင်သ္ၚိလေဝ် ကၟဳထောင် ဗဒင်စာ် အပေါတ်သ္ၚိမပ္တံကဵု ဖုန်ဂၞဳ ထကဝ်တံဂှ်လေဝ် ပြးဇးဂတးဂတန်ဂွံညာတ်သာ်ဂှ်တုဲ အဲဍိက်ဗြဴတုပ်ညံင်ရဴညးက္ၜင်ဗြမ်၊ ညးမွဲရော ဟွံဟံင်ပြာ်၊ အဴ အာစိုပ်ဒဒိုက်ဗွဲမလောန်ရသွံဏး၊
	ယွံလေဝ် နာဲပိုဲ ပ္တံနူနာဲပိုဲကရဴထောံစးၜးအာဘဝတုဲ ပြေင်လဝ်ပုင်သွသွက်နာဲပိုဲလေဝ် ညးစရောဟွံမွဲ၊ ပုင်သွရုဲဗဗဵုကၠံင်အဴ ဒှ်ဓရ်စံင်တူသောကဒဵုဂလိုင်ဏံဏောင်သွံ နာဲပိုဲ။
	ယွံလေဝ် နာဲပိုဲ ပတွဵုနူကဵုအဲဍိက်ဒေံဗြဴပံင်ဖက်ကေုာံနာဲပိုဲတုဲလ္တူနာဲပိုဲဂှ် သစ္စဟွံဂွံလီု၊ နာဲပိုဲညံင်ဂွံဒှ် တသိုက်စိုတ် ဒေံဗြဴဏံဖန်ဇန်လဝ်ကီုလေဝ်၊ လၟုဟ်ဂွံကောန်ဗြဴရတ်မွဲတုဲမှ နာဲပိုဲဒဴထောံဂှ် အဲဍိက်ဒေံဗြဴဏံခန္ဓ ပြဟ်လလုဲချိုတ်အာတုဲမှ ဂွံဒှ်တသိုက်စိုတ်ရဟာ။
	မိလီစၞာဲဂှ် ယာံဂတေဝ်ကရဳကရောတ်ဖဲပေင်စိုတ်တုဲ ဇွကမ္မဌာန်အနာဲဗာန်ဂှ် စံင်ဂြဇုတ်ရ၊ ပေင်မွဲ သတ္တာဟ ပကုသိုလ်စရိုဟ်ဍာ်ဇိုန်ပိုန်ပါ်ပရံကုသိုလ်ရောင် ဂးတုဲ သွက်ဂွံပကုသိုလ်ဂှ်စဳရေင်ဖန်ဖက်စၞ အာဟာရဘောဇိုန်အပေါတ်ကဵုဒါန်တံဂှ်တုဲ တိတ်အာ ဘာလကျာ်ဖာပ်သင်ကဵုဒါန်ရ၊ စရိုဟ်ဍာ်ဗပါ်တၟံပါ်ပရံဇိုန် ကဵုကုသိုလ်သွက် အနာဲဗာန် ရ။