Tsy dia tadidy loatra ny tena lohateniny marina, saigy mbola tavela tsara ao an-tsaina ny fiverenany manao hoe “Dia mitaky hoe omeo, omeo, omeo… omeo hatrany.
Tsy misy hataka andro na hoe famindram-po”. Hiran’ny mpanakanto Bessa tany amin’ny taona 72 tany izy io. Hira izay “nanahirana” ny mpitondra tamin’izany fotoana izany, satria nitsikera sy nampivandravandra ny fomba ratsin’ny mpiasam-panjakana, nanery ny olom-pirenena handoa hetra. Tsaroana io hira io amin’izao fotoana izao rehefa nahare tamin’ny fampahalalam-baovao isanisany ny ambangovangon’ny voarakitra ao amin’ilay tetibolam-panjakana nasiana fanitsiana. Anisan’ny nanaitra ny maro indrindra tamin’izany ny nahafantarana fa hotataovana hetra hatramin’ny mpanakanto, hono. Gaga ny rehetra ka velom-panontaniana: fa maninona àry ê?... Mipetraka ny fanontaniana, satria ny ahafantarana an’izany mpanakanto izany, ary araka ny famaritana rahateo, dia maha mpampiala voly azy ireny. Tsy misy tsy mahalala koa fa tsy maha velona ny asan’izy ireo fa karazana “tsindrotsindroka” tsindraindray ihany. Raha ny tena marina aza dia fanampiana no tokony homena azy ireo, koa nahoana no hovesarana hetra indray ê?... Dila izay ny enim-bolana voalohany naha teo amin’ny toerany ny fitondrana amin’izao fotoana izao, ary “milaza miara-mahita”, araka ny fitenenana ny mpanaraka ny raharaham-pirenena fa fahadisoam-panantenana no fahatsapana. Raha fivoahana amin’ny krizy sy fihatsaran’ny fari-piainana no nantenain’ny vahoaka dia ny mifanohitra amin’izany no iainany fa ankoatra ny sondro-bidim piainana dia izao fa hitombo ihany koa izany ny vola hivoaka ny paosy. Tsy resahina intsony ny “sotasota” isan-karazany, toy ny namolavolana ny lalàna hahafahana manasazy amin’ny fomba henjana ireo maneho hevitra tsy metimety amin’ny olom-panjakana. Ilay lalàna malaza momba ny “cybercriminalité” io lazaina io, izay tsy ny mpampahalala vaovao ihany no hiharany fa izay rehetra miteny na manoratra, na mamoaka feo mihitsy. Ny gasy rehetra tsy ao amin’ny fanjakana izany ê. Maro no milaza ny hoe “mbola tsy nisy ohatra an’ity hatramin’izay nahatsiarovana saina”. Toa marina tokoa izany, ho an’ny vao tato ho ato no “nahatsiaro saina” fa ny mpanaraka ny raharaham-pirenena kosa “mahita” fa efa niainana ny toa izao tany amin’ny 40 taona lasa tany ho any. Ny mpanaraka ny raharaham-pirenena koa anefa dia mahatsiaro fa tsy “sahirana” tahaka ny amin’izao ny vahoaka tamin’izany, ary ny mpitondra dia “mba” nahavita nanangan-javatra nanamorana ny fiainan’ny mponina, raha tsy hampahatsiahy afa-tsy ireny “Cités”, hôpitaly, toeram-pianarana sy fiofanana isan-karazany ireny. Ny ankehitriny kosa dia “mitaky hoe omeo, omeo, omeo, omeo…hatrany” ê. Mijanona hatreo ny soratra, sao ho lasa “crime”! Lalou |