LEGAZPI CITY – Nagpaparahay pa ngunyan sa Bicol Regional Teaching and Training Hospital (BRTTH) si Rosemarie Bartolata kan P-7 Brgy. Bankilingam, Tabaco City makalihis na saksakon kan sadiring byenan.
Magigirumduman na bigla na sana ining nilaog sa harong kan 74-anyos na suspek na si Agustin Bartolata mantang nagdadalan nin telebisyon asin sinaksak.
Lugad sa walang takyag an sinapar ni Rosemarie na nagbalda pa sa kili-kili.
Susog sa imbestigasyon kan Tabaco City Police Station, sinabi ni PCI Jon Retumban na haloy nang igwa nin iwal an duwang lado kun sain pighumaaan pa ni Agustin na saiyang gagadanon an biktima.
Alagad dugang ni Retumban, dae ninda aram an pinakarason sa likod kan dagit kan byenan sa saiyang manugang.
Nakadalagan paluwas sa harong si Rosemarie asin nakahagad nin tabang makalihis an pananaksak kun kaya nagpalyar an suspek na gibuhon an saiyang enot nang huma digdi.
Sinabi man kan nasambitan na pulis na pighahanda na ninda an kasong attempted murder kontra sa nasambitan na suspetsado.
