Для ўладальнікаў электрамабіляў адмянілі транспартны падатак на 5 гадоў
Электрамабілі вызвалілі ад транспартнага падатку да канца 2025 года.
Пра гэта паведаміў начальнік галоўнага ўпраўлення падаткаабкладання фізічных асоб МПЗ Андрэй Кавалеўскі, піша БЕЛТА.
Не будуць выплачваць транспартны падатак уладальнікі транспартных сродкаў катэгорыі М1, М1G (легкавыя электрамабілі і легкавыя электрамабілі павышанай праходнасці), якія прыводзяцца ў рух выключна электрарухавіком. Такая льгота прадастаўлена да 31 снежня 2025 года», — сказаў Андрэй Кавалеўскі.
У Беларусі спрабуюць стымуляваць попыт на электракары. Год таму Аляксандр Лукашэнка падпісаў указ «Аб стымуляванні выкарыстання электрамабіляў». Уласнікаў электрамабіляў вызвалілі ад выплаты дарожнага збору і ПДВ пры куплі электракара для асабістага карыстання, а таксама ад мытнай пошліны, нагадвае dev.by.
Паводле інфармацыі першага аператара маркі Tesla ў Беларусі tesla-cars.by, за мінулы год кампанія прадала 30 новых аўтамабіляў. Гэта ў 1,5 разу больш, чым у 2019 годзе. Усяго беларусы патрацілі на новыя Tesla ў мінулым годзе каля 2,5 мільёнаў даляраў.
У сваю чаргу завод «БелДжы» планаваў сёлета выпусціць першую партыю электрамабіляў.
Агульная колькасць зарэгістраваных электрамабіляў у Беларусі перавышае 2,5 тысячы.